pyar ki har ek rasm ki jo matruk thi maine jari ki

pyaar kī har ik rasm ki jo matrūk thī maiñ ne jaarī kī

ishq-labāda tan par pahnā aur mohabbat taarī kī

maiñ ab shahr-e-ishq meñ kuchh qānūn banāne vaalā huuñ

ab us us kī ḳhair nahīñ hai jis jis ne ġhaddārī kī

pahle thoḌī bahut mohabbat kī ki kaisī hotī hai

par jab aslī chehra dekhā maiñ ne to phir saarī kī

jo bhī muḌ kar dekhegā vo patthar kā ho jā.egā

dekho dekho shahr meñ aa.e sannāTā aur tārīkī

ek janam meñ maiñ us kā thā ek janm meñ vo merā

ham ne kī har baar mohabbat lekin baarī baarī kī

ham sā ho to sāmne aa.e aadil aur insāf-pasand

dushman ko bhī ḳhuun rulāyā yāroñ se bhī yaarī kī

aisā pyaar thā ham donoñ meñ ki barsoñ lā-ilm rahe

us ne bhī kirdār nibhāyā maiñ ne bhī fankārī kī

baat to itnī sī hai vāpas jaane ko maiñ aayā thā

saañs uThā.ī umr sameTī chalne kī tayyārī kī

pyar ki har ek rasm ki jo matruk thi main ne jari ki

ishq-labaada tan par pahna aur mohabbat tari ki

main ab shahr-e-ishq mein kuchh qanun banane wala hun

ab us us ki KHair nahin hai jis jis ne ghaddari ki

pahle thoDi bahut mohabbat ki ki kaisi hoti hai

par jab asli chehra dekha main ne to phir sari ki

jo bhi muD kar dekhega wo patthar ka ho jaega

dekho dekho shahr mein aae sannaTa aur tariki

ek janam mein main us ka tha ek janm mein wo mera

hum ne ki har bar mohabbat lekin bari bari ki

hum sa ho to samne aae aadil aur insaf-pasand

dushman ko bhi KHun rulaya yaron se bhi yari ki

aisa pyar tha hum donon mein ki barson la-ilm rahe

us ne bhi kirdar nibhaya main ne bhi fankari ki

baat to itni si hai wapas jaane ko main aaya tha

sans uThai umr sameTi chalne ki tayyari ki