pyar ki rah mein aksar aisa dard uThana paD jata hai

pyaar kī raah meñ aksar aisā dard uThānā paḌ jaatā hai

dil meñ rahne vāloñ ko bhī dil se bhulānā paḌ jaatā hai

des kī bāteñ des meñ hoñgī ye pardes hai is meñ pyāre

ūñchī nīchī bāteñ sun kar chup ho jaanā paḌ jaatā hai

aksar aisā bhī hotā hai mālik terī is duniyā meñ

nāzuk nāzuk shānoñ ko bhī bojh uThānā paḌ jaatā hai

pyaar kī qasmeñ khāne vaale bhī harjā.ī ban jaa.eñ to

jhūTe sachche vā'doñ se hī dil bahlānā paḌ jaatā hai

is jīvan kī ūñchī nīchī rāhoñ meñ ai dost kabhī

phuul samajh kar zaḳhmoñ ko siine se lagānā paḌ jaatā hai

nannhī nannhī āñkhoñ meñ bhī ḳhuun ke aañsū aa jaa.eñ to

qismat jaan ke un ko bhī siine se lagānā paḌ jaatā hai

kabhī 'zafar' yuuñ bhī hotā hai vaqt nibhāne kī ḳhātir hī

apnī jaan ke dushman se bhī haath milānā paḌ jaatā hai

pyar ki rah mein aksar aisa dard uThana paD jata hai

dil mein rahne walon ko bhi dil se bhulana paD jata hai

des ki baaten des mein hongi ye pardes hai is mein pyare

unchi nichi baaten sun kar chup ho jaana paD jata hai

aksar aisa bhi hota hai malik teri is duniya mein

nazuk nazuk shanon ko bhi bojh uThana paD jata hai

pyar ki qasmen khane wale bhi harjai ban jaen to

jhuTe sachche wa'don se hi dil bahlana paD jata hai

is jiwan ki unchi nichi rahon mein ai dost kabhi

phul samajh kar zaKHmon ko sine se lagana paD jata hai

nannhi nannhi aankhon mein bhi KHun ke aansu aa jaen to

qismat jaan ke un ko bhi sine se lagana paD jata hai

kabhi 'zafar' yun bhi hota hai waqt nibhane ki KHatir hi

apni jaan ke dushman se bhi hath milana paD jata hai