پیار کی راہ میں اکثر ایسا درد اٹھانا پڑ جاتا ہے

پیار کی راہ میں اکثر ایسا درد اٹھانا پڑ جاتا ہے

دل میں رہنے والوں کو بھی دل سے بھلانا پڑ جاتا ہے

دیس کی باتیں دیس میں ہوں گی یہ پردیس ہے اس میں پیارے

اونچی نیچی باتیں سن کر چپ ہو جانا پڑ جاتا ہے

اکثر ایسا بھی ہوتا ہے مالک تیری اس دنیا میں

نازک نازک شانوں کو بھی بوجھ اٹھانا پڑ جاتا ہے

پیار کی قسمیں کھانے والے بھی ہرجائی بن جائیں تو

جھوٹے سچے وعدوں سے ہی دل بہلانا پڑ جاتا ہے

اس جیون کی اونچی نیچی راہوں میں اے دوست کبھی

پھول سمجھ کر زخموں کو سینے سے لگانا پڑ جاتا ہے

ننھی ننھی آنکھوں میں بھی خون کے آنسو آ جائیں تو

قسمت جان کے ان کو بھی سینے سے لگانا پڑ جاتا ہے

کبھی ظفرؔ یوں بھی ہوتا ہے وقت نبھانے کی خاطر ہی

اپنی جان کے دشمن سے بھی ہاتھ ملانا پڑ جاتا ہے