pyas arman ki taDap dil ki ghuTan jazbaat ki

pyaas armāñ kī taḌap dil kī ghuTan jazbāt kī

jaane kyā kyā de ga.ī tohfe udāsī raat kī

lamha lamha zehn-o-dil ke fāsle baḌhte rahe

go ki dil rakhne ko aksar us ne mujh se baat kī

aadmī kī shakl meñ phirte haiñ vīrāne yahāñ

apne kāñdhoñ par uThā.e mayyateñ jazbāt kī

qahqahoñ ke rang chehre par bikhere to bahut

phir bhī yaaro kuchh ḳharāsheñ rah ga.iiñ sadmāt kī

ham ko hai is tarah ik va.ada shikan kā intizār

raah dekhe jis tarah taptī zamīñ barsāt kī

maut ko hañste hue ham to lagā leñge gale

par nahīñ ham ko gavāra saañs bhī ḳhairāt kī

āshiqī meñ ho ga.ī apnī ye hālat ai 'payām'

chup rahe to chup rahe aur baat kī to baat kī

pyas arman ki taDap dil ki ghuTan jazbaat ki

jaane kya kya de gai tohfe udasi raat ki

lamha lamha zehn-o-dil ke fasle baDhte rahe

go ki dil rakhne ko aksar us ne mujh se baat ki

aadmi ki shakl mein phirte hain virane yahan

apne kandhon par uThae mayyaten jazbaat ki

qahqahon ke rang chehre par bikhere to bahut

phir bhi yaro kuchh KHarashen rah gain sadmat ki

hum ko hai is tarah ek wada shikan ka intizar

rah dekhe jis tarah tapti zamin barsat ki

maut ko hanste hue hum to laga lenge gale

par nahin hum ko gawara sans bhi KHairaat ki

aashiqi mein ho gai apni ye haalat ai 'payam'

chup rahe to chup rahe aur baat ki to baat ki