pyas jo bujh na saki uski nishani hogi

pyaas jo bujh na sakī us kī nishānī hogī

ret par likkhī huī merī kahānī hogī

vaqt alfāz kā mafhūm badal detā hai

dekhte dekhte har baat purānī hogī

kar ga.ī jo mirī palkoñ ke sitāre raushan

vo bikharte hue sūraj kī nishānī hogī

phir añdhere meñ na kho jaa.e kahīñ us kī sadā

dil ke āñgan meñ na.ī sham' jalānī hogī

apne ḳhvāboñ kī tarah shāḳh se TuuTe hue phuul

chun rahī huuñ koī tasvīr sajānī hogī

be-zabāñ kar gayā mujh ko to savāloñ kā hujūm

zindagī aaj tujhe baat banānī hogī

kar rahī hai jo mire 'aks ko dhuñdlā 'sarvat'

maiñ ne duniyā kī koī baat na maanī hogī

pyas jo bujh na saki us ki nishani hogi

ret par likkhi hui meri kahani hogi

waqt alfaz ka mafhum badal deta hai

dekhte dekhte har baat purani hogi

kar gai jo meri palkon ke sitare raushan

wo bikharte hue suraj ki nishani hogi

phir andhere mein na kho jae kahin us ki sada

dil ke aangan mein nai sham' jalani hogi

apne KHwabon ki tarah shaKH se TuTe hue phul

chun rahi hun koi taswir sajaani hogi

be-zaban kar gaya mujh ko to sawalon ka hujum

zindagi aaj tujhe baat banani hogi

kar rahi hai jo mere 'aks ko dhundla 'sarwat'

main ne duniya ki koi baat na mani hogi