پیاسا رکھتا ہے اپنے اندر بھی

پیاسا رکھتا ہے اپنے اندر بھی

کتنا ظالم ہے یہ سمندر بھی

ہم نے دیکھا ہے ایسا منظر بھی

دیکھ کر خون رویا خنجر بھی

قتل کرنے کو آنکھیں کافی تھیں

لے کے آئے ہو آپ خنجر بھی

عیب پھر بھی چھپے نہیں میرے

اوڑھ کے دیکھی میں نے چادر بھی

پونچھنے آنسو کون آتا ہے

ہم نے دیکھا ہے یار رو کر بھی

کہتے ہیں جو عمل نہیں کرتے

ایسے ہوتے ہیں کیا سخنور بھی

ہے فقیری بھلے مقدر میں

دل کے لیکن ہیں ہم سکندر بھی

جب سے بیوی چلی گئی لڑ کر

ہنستا رہتا ہے مجھ پہ بستر بھی

معجزہ یہ نہیں تو اور کیا ہے

پاس دل کے ہیں دور رہ کر بھی

شعر کہتا ہوں اس لئے عاطفؔ

زندہ رہنا ہے مجھ کو مر کر بھی