pyasa rakhta hai apne andar bhi

pyāsā rakhtā hai apne andar bhī

kitnā zālim hai ye samundar bhī

ham ne dekhā hai aisā manzar bhī

dekh kar ḳhuun royā ḳhanjar bhī

qatl karne ko āñkheñ kaafī thiiñ

le ke aa.e ho aap ḳhanjar bhī

'aib phir bhī chhupe nahīñ mere

oḌh ke dekhī maiñ ne chādar bhī

poñchhne aañsū kaun aatā hai

ham ne dekhā hai yaar ro kar bhī

kahte haiñ jo 'amal nahīñ karte

aise hote haiñ kyā suḳhanvar bhī

hai faqīrī bhale muqaddar meñ

dil ke lekin haiñ ham sikandar bhī

jab se biivī chalī ga.ī laḌ kar

hañstā rahtā hai mujh pe bistar bhī

mo'jiza ye nahīñ to aur kyā hai

paas dil ke haiñ duur rah kar bhī

she'r kahtā huuñ is liye 'ātif'

zinda rahnā hai mujh ko mar kar bhī

pyasa rakhta hai apne andar bhi

kitna zalim hai ye samundar bhi

hum ne dekha hai aisa manzar bhi

dekh kar KHun roya KHanjar bhi

qatl karne ko aankhen kafi thin

le ke aae ho aap KHanjar bhi

'aib phir bhi chhupe nahin mere

oDh ke dekhi main ne chadar bhi

ponchhne aansu kaun aata hai

hum ne dekha hai yar ro kar bhi

kahte hain jo 'amal nahin karte

aise hote hain kya suKHanwar bhi

hai faqiri bhale muqaddar mein

dil ke lekin hain hum sikandar bhi

jab se biwi chali gai laD kar

hansta rahta hai mujh pe bistar bhi

mo'jiza ye nahin to aur kya hai

pas dil ke hain dur rah kar bhi

she'r kahta hun is liye 'atif'

zinda rahna hai mujh ko mar kar bhi