pyasi dharti mang rahi hai jag ke data pani de

pyāsī dhartī maañg rahī hai jag ke daatā paanī de

sāgar sāgar jal-thal kar de dariyā dariyā paanī de

tū hī avval tū hī āḳhir tū hī rab tū hī ma.abūd

duniyā kī har ek baḌā.ī tujh ko zebā paanī de

har rangat meñ terī ḳhushbū har ḳhushbū meñ terā rang

zarra zarra nahīñ kisī kā sab kuchh terā paanī de

tujh ko to ma.alūm hai tere bandoñ kī hājat kyā hai

apnī is maḳhlūq pe thoḌī shafqat farmā paanī de

jaane kitne haath uThe haiñ terī jānib hasrat se

in hāthoñ kī laaj bachā le rahm-sarāpā paanī de

sāvan to pyāsī dhartī par aag jalā kar chalā gayā

kam se kam bhādoñ hī kar de dāman giilā paanī de

phūloñ se pākīza chehre shabnam se ma.asūm badan

ḳhvāboñ se nāzuk sāyoñ ko aur na tarsā paanī de

tūfānī sailāb se haT kar sūkhe mausam se kuchh duur

jitnī gahrī pyaas ho jis kī us ko utnā paanī de

ham to tujh ko bhulā chuke haiñ bhuul na lekin tū ham ko

pyāsī hai 'parvāz' ye duniyā rahmat barsā paanī de

pyasi dharti mang rahi hai jag ke data pani de

sagar sagar jal-thal kar de dariya dariya pani de

tu hi awwal tu hi aaKHir tu hi rab tu hi mabud

duniya ki har ek baDai tujh ko zeba pani de

har rangat mein teri KHushbu har KHushbu mein tera rang

zarra zarra nahin kisi ka sab kuchh tera pani de

tujh ko to malum hai tere bandon ki hajat kya hai

apni is maKHluq pe thoDi shafqat farma pani de

jaane kitne hath uThe hain teri jaanib hasrat se

in hathon ki laj bacha le rahm-sarapa pani de

sawan to pyasi dharti par aag jala kar chala gaya

kam se kam bhadon hi kar de daman gila pani de

phulon se pakiza chehre shabnam se masum badan

KHwabon se nazuk sayon ko aur na tarsa pani de

tufani sailab se haT kar sukhe mausam se kuchh dur

jitni gahri pyas ho jis ki us ko utna pani de

hum to tujh ko bhula chuke hain bhul na lekin tu hum ko

pyasi hai 'parwaz' ye duniya rahmat barsa pani de