qabil-e-did tha jo rang bhi taghir mein tha

qābil-e-dīd thā jo rang bhī taġh.īr meñ thā

lutf duniyā kī badaltī huī tasvīr meñ thā

harf-e-be-kār thā jo kuchh mirī taqdīr meñ thā

hal har ik uqda-e-dushvār kā tadbīr meñ thā

merī taqsīr ne insān banāyā mujh ko

merī islāh kā pahlū mirī ta.azīr meñ thā

ab sazā-vār-e-fanā koī banā le varna

mudda.ā ziist kā muzmar mirī taqsīr meñ thā

ḳhaak duniyā pe asīrī kī lagā.eñ tohmat

paañv pahle hī se uljhā huā zanjīr meñ thā

ek majmūa-e-ziddain thī hastī merī

juzv-e-taḳhrīb bhī shāmil mirī ta.amīr meñ thā

mere jazbāt kā iz.hār mukammal kartā

hausla itnā qalam meñ thā na taqrīr meñ thā

sab mire husn-e-taḳhyyul kī fusūñ-kārī thī

ḳhvāb meñ thā na asar ḳhvāb kī ta.abīr meñ thā

na huī haañ na huī aur kisī ko taufīq

dil-e-marhūm kā mātam mirī taqdīr meñ thā

yuuñ na fil-faur huiiñ merī duā.eñ maqbūl

imtihāñ sabr kā pinhāñ tirī tāḳhīr meñ thā

aur rūdād-e-alam kaise mukammal hotī

ġham-e-ustād bhī 'tālib' tirī taqdīr meñ thā

qabil-e-did tha jo rang bhi taghir mein tha

lutf duniya ki badalti hui taswir mein tha

harf-e-be-kar tha jo kuchh meri taqdir mein tha

hal har ek uqda-e-dushwar ka tadbir mein tha

meri taqsir ne insan banaya mujh ko

meri islah ka pahlu meri tazir mein tha

ab saza-war-e-fana koi bana le warna

muddaa zist ka muzmar meri taqsir mein tha

KHak duniya pe asiri ki lagaen tohmat

panw pahle hi se uljha hua zanjir mein tha

ek majmua-e-ziddain thi hasti meri

juzw-e-taKHrib bhi shamil meri tamir mein tha

mere jazbaat ka izhaar mukammal karta

hausla itna qalam mein tha na taqrir mein tha

sab mere husn-e-taKHyyul ki fusun-kari thi

KHwab mein tha na asar KHwab ki tabir mein tha

na hui han na hui aur kisi ko taufiq

dil-e-marhum ka matam meri taqdir mein tha

yun na fil-faur huin meri duaen maqbul

imtihan sabr ka pinhan teri taKHir mein tha

aur rudad-e-alam kaise mukammal hoti

gham-e-ustad bhi 'talib' teri taqdir mein tha