qabil-e-rashk zat phulon ki

qābil-e-rashk zaat phūloñ kī

ḳhuub hai kā.enāt phūloñ kī

ḳhushbuoñ ka safar tavīl magar

muḳhtasar hai hayāt phūloñ kī

kar chuke haiñ vuzū vo shabnam se

ho rahī hai salāt phūloñ kī

so ga.e haiñ lipaT ke kāñToñ se

kyā qayāmat hai raat phūloñ kī

hai asīr-e-qafas ke hoñToñ par

zikr kaliyoñ ka baat phūloñ kī

un ke hañsne se khil ga.e ġhunche

un ke dam se hayāt phūloñ kī

chand lamhoñ meñ khil ke murjhā.eñ

zindagī be-sabāt phūloñ kī

saarī mahfil mahak ga.ī 'anjum'

sher haiñ yā barāt phūloñ kī

hai ġhazal meñ chamak bhī 'anjum' kī

aur mahak saath saath phūloñ kī

qabil-e-rashk zat phulon ki

KHub hai kaenat phulon ki

KHushbuon ka safar tawil magar

muKHtasar hai hayat phulon ki

kar chuke hain wuzu wo shabnam se

ho rahi hai salat phulon ki

so gae hain lipaT ke kanTon se

kya qayamat hai raat phulon ki

hai asir-e-qafas ke honTon par

zikr kaliyon ka baat phulon ki

un ke hansne se khil gae ghunche

un ke dam se hayat phulon ki

chand lamhon mein khil ke murjhaen

zindagi be-sabaat phulon ki

sari mahfil mahak gai 'anjum'

sher hain ya baraat phulon ki

hai ghazal mein chamak bhi 'anjum' ki

aur mahak sath sath phulon ki