qabil-e-sharh mera haal-e-dil-e-zar na tha

qābil-e-sharh mirā hāl-e-dil-e-zār na thā

sunñe vaale to bahut the koī ġham-ḳhvār na thā

ab vo jiine ke liye soch rahā hai tadbīr

apne hāthoñ jise marnā kabhī dushvār na thā

mujh se pūchho to qazā us kī hai maut us kī hai

dosh-e-ahbāb pe jo mar ke girāñ-bār na thā

chunte the baaġh meñ aa aa kar unheñ ahl-e-junūñ

āshiyāñ kā mire tinkā koī bekār na thā

ye hamīñ ne to mohabbat kī nikālīñ rasmeñ

aap par marne ko pahle koī tayyār na thā

dām-e-sayyād meñ āzād rahā shikva-e-ġham

maiñ giraftār thā lekin ye giraftār na thā

ab unheñ sāmne aane meñ hai uzr ai 'bismil'

milne-julne se jinheñ peshtar inkār na thā

qabil-e-sharh mera haal-e-dil-e-zar na tha

sunne wale to bahut the koi gham-KHwar na tha

ab wo jine ke liye soch raha hai tadbir

apne hathon jise marna kabhi dushwar na tha

mujh se puchho to qaza us ki hai maut us ki hai

dosh-e-ahbab pe jo mar ke giran-bar na tha

chunte the bagh mein aa aa kar unhen ahl-e-junun

aashiyan ka mere tinka koi bekar na tha

ye hamin ne to mohabbat ki nikalin rasmen

aap par marne ko pahle koi tayyar na tha

dam-e-sayyaad mein aazad raha shikwa-e-gham

main giraftar tha lekin ye giraftar na tha

ab unhen samne aane mein hai uzr ai 'bismil'

milne-julne se jinhen peshtar inkar na tha