قابو نہیں حواس پہ بس میں نظر نہیں

قابو نہیں حواس پہ بس میں نظر نہیں

وہ آئے اور گئے مجھے یہ بھی خبر نہیں

ان کی نوازشیں جو مرے حال پر نہیں

بے تاب و بے قرار ہوں اپنی خبر نہیں

کار جہان عشق میں ناکامیاں کہاں

تکمیل آرزو تو تری رہ گزر نہیں

طوفان غم سے کھیل زمانے کے ساتھ ساتھ

منزل کی جستجو کوئی دشوار تر نہیں

دنیائے آرزو کی ہر اک شے فریب ہے

یہ بھی فریب ہے کہ قریب نظر نہیں

عیش و خوشی کے دور گذشتہ کو بھول جا

کیا نظم زندگی ترے پیش نظر نہیں

اس بے سبب خلوص کا احساس ہے مگر

مجھ کو تو اب یقین کسی بات پر نہیں

ان کی عنایتوں پہ مدار حیات ہے

ان کے بغیر رونق شام و سحر نہیں

منزل کی جستجو میں تلون فضول ہے

باسطؔ تلاش راہ کوئی مختصر نہیں