qabu nahin hawas pe bas mein nazar nahin

qaabū nahīñ havās pe bas meñ nazar nahīñ

vo aa.e aur ga.e mujhe ye bhī ḳhabar nahīñ

un kī navāzisheñ jo mire haal par nahīñ

be-tāb-o-be-qarār huuñ apnī ḳhabar nahīñ

kār-e-jahān-e-'ishq meñ nākāmiyāñ kahāñ

takmīl-e-ārzū to tirī rahguzar nahīñ

tūfān-e-ġham se khel zamāne ke saath saath

manzil kī justujū koī dushvār-tar nahīñ

duniyā-e-ārzū kī har ik shai fareb hai

ye bhī fareb hai ki qarīb-e-nazar nahīñ

aish-o-ḳhushī ke daur-e-guzishta ko bhuul jā

kyā nazm-e-zindagī tire pesh-e-nazar nahīñ

is be-sabab ḳhulūs kā ehsās hai magar

mujh ko to ab yaqīn kisī baat par nahīñ

un kī ‘ināyatoñ pe madār-e-hayāt hai

un ke baġhair raunaq-e-shām-o-sahar nahīñ

manzil kī justujū meñ talavvun fuzūl hai

'bāsit' talāsh-e-rāh koī muḳhtasar nahīñ

qabu nahin hawas pe bas mein nazar nahin

wo aae aur gae mujhe ye bhi KHabar nahin

un ki nawazishen jo mere haal par nahin

be-tab-o-be-qarar hun apni KHabar nahin

kar-e-jahan-e-'ishq mein nakaamiyan kahan

takmil-e-arzu to teri rahguzar nahin

tufan-e-gham se khel zamane ke sath sath

manzil ki justuju koi dushwar-tar nahin

duniya-e-arzu ki har ek shai fareb hai

ye bhi fareb hai ki qarib-e-nazar nahin

aish-o-KHushi ke daur-e-guzishta ko bhul ja

kya nazm-e-zindagi tere pesh-e-nazar nahin

is be-sabab KHulus ka ehsas hai magar

mujh ko to ab yaqin kisi baat par nahin

un ki ‘inayaton pe madar-e-hayat hai

un ke baghair raunaq-e-sham-o-sahar nahin

manzil ki justuju mein talawwun fuzul hai

'basit' talash-e-rah koi muKHtasar nahin