qafile se bharosa uThana paDa

qāfile se bharosā uThānā paḌā

apnā rastā mujhe ḳhud banānā paḌā

uñgliyāñ thaam kar chalne kī 'umr thī

jab mujhe bojh apnā uThānā paḌā

aaj phir paas apne kirāya na thā

madrase pā-piyāda hī jaanā paḌā

dostoñ ne to phir bhī tavaqquf kiyā

qarz bhaa.ī kā pahle chukānā paḌā

āb-e-rahmat ne shab jo chhuā khaaT ko

ghar paḌosī ke bistar lagānā paḌā

tifl jab bilbilāyā kaḌī bhuuk se

bech kar ḳhuun bhī duudh laanā paḌā

un se mīrās pūchho na ai dosto

bojh qarzoñ kā jin ko uThānā paḌā

sab hī nikle jo 'dīpak' namak-pāsh to

ḳhud hī zaḳhmoñ pe marham lagānā paḌā

qafile se bharosa uThana paDa

apna rasta mujhe KHud banana paDa

ungliyan tham kar chalne ki 'umr thi

jab mujhe bojh apna uThana paDa

aaj phir pas apne kiraya na tha

madrase pa-piyaada hi jaana paDa

doston ne to phir bhi tawaqquf kiya

qarz bhai ka pahle chukana paDa

aab-e-rahmat ne shab jo chhua khaT ko

ghar paDosi ke bistar lagana paDa

tifl jab bilbilaya kaDi bhuk se

bech kar KHun bhi dudh lana paDa

un se miras puchho na ai dosto

bojh qarzon ka jin ko uThana paDa

sab hi nikle jo 'dipak' namak-pash to

KHud hi zaKHmon pe marham lagana paDa