qafile yaadon ke yun dil mein mere dar aae

qāfile yādoñ ke yuuñ dil meñ mire dar aa.e

jaise pardes se barsoñ meñ koī ghar aa.e

vasl kī raah meñ hai hijr kā sahrā-e-azīm

kaise milne kabhī dariyā se samundar aa.e

ātish-e-sahn-e-chaman sirf chaman tak na rahī

chand sho.ale mire dāman pe bhī uḌ kar aa.e

qarz ahbāb kā us vaqt kiyā maiñ ne adā

jab mire sāmne vo taan ke ḳhanjar aa.e

zulm-o-bedād kā sūraj hai savā neze par

kyoñ na is daur meñ bhī koī payambar aa.e

un se itnā bhī ta'alluq na baḌhā tū ai dil

mujh se milne kā koī pal na mayassar aa.e

dil meñ 'shādāñ' mire ābād hai vo ġhuncha-dahan

jis kī har saañs se ḳhushbū-e-gul-e-tar aa.e

qafile yaadon ke yun dil mein mere dar aae

jaise pardes se barson mein koi ghar aae

wasl ki rah mein hai hijr ka sahra-e-azim

kaise milne kabhi dariya se samundar aae

aatish-e-sahn-e-chaman sirf chaman tak na rahi

chand shoale mere daman pe bhi uD kar aae

qarz ahbab ka us waqt kiya main ne ada

jab mere samne wo tan ke KHanjar aae

zulm-o-bedad ka suraj hai sawa neze par

kyon na is daur mein bhi koi payambar aae

un se itna bhi ta'alluq na baDha tu ai dil

mujh se milne ka koi pal na mayassar aae

dil mein 'shadan' mere aabaad hai wo ghuncha-dahan

jis ki har sans se KHushbu-e-gul-e-tar aae