qafiya par qafiya hazrat raqam karte gae

qāfiya par qāfiya hazrat raqam karte ga.e

or ġhazal ke hāth-pairoñ ko qalam karte ga.e

vaise vaise sab azīzoñ ke chahete ho ga.e

jaise jaise chā.e-pānī mohtaram karte ga.e

samt-e-manzil chalte chalte paañv roke baar baar

us ke ta.ane roz lekin tāza-dam karte ga.e

kyā batā.eñ aap ko un kī karam-farmā.iyāñ

ham ināyat aur vo ham par sitam karte ga.e

jab suḳhan-fahmoñ kī kam-fahmī se vāqif ho ga.e

din-ba-din ham sher-goī kam se kam karte ga.e

jabki rusvā.ī milā har ḳhair-ḳhvāhī kā badal

ḳhair-ḳhvāhī phir bhī ham har har qadam karte ga.e

qafiya par qafiya hazrat raqam karte gae

or ghazal ke hath-pairon ko qalam karte gae

waise waise sab azizon ke chahete ho gae

jaise jaise chae-pani mohtaram karte gae

samt-e-manzil chalte chalte panw roke bar bar

us ke tane roz lekin taza-dam karte gae

kya bataen aap ko un ki karam-farmaiyan

hum inayat aur wo hum par sitam karte gae

jab suKHan-fahmon ki kam-fahmi se waqif ho gae

din-ba-din hum sher-goi kam se kam karte gae

jabki ruswai mila har KHair-KHwahi ka badal

KHair-KHwahi phir bhi hum har har qadam karte gae