qasid KHilaf-e-KHat kahin tera bayan na ho

qāsid ḳhilāf-e-ḳhat kahīñ terā bayāñ na ho

karnā sambhal ke baat ki vo bad-gumāñ na ho

nāloñ kā mere āTh-pahr imtihāñ na ho

Darte nahīñ ki ek zamīñ āsmāñ na ho

tohmat ho bhūl-chūk kī paiġhāmbar ke sar

shikvoñ kā lutf kyā jo koī darmiyāñ na ho

nāloñ se laḌ rahī hai sadā-e-jaras jo aaj

gum-karda-rāh koī pas-e-kārvāñ na ho

sau sun ke ek bhī na kaheñ ham bajā durust

us se ye kahiye aa.e ki jis ke zabāñ na ho

ab tak vo yaad haiñ mirī aglī ināyateñ

bas bas hamāre haal pe tū mehrbāñ na ho

chhūTī tirī galī to ye mujh ko yaqīñ huā

jannat hai vo jahāñ sitam-e-āsmāñ na ho

karte haiñ ek ek se merī shikāyateñ

sirf is ḳhayāl se ki koī bad-gumāñ na ho

ye kyā ki sar chaḌhā ke nazar se girā diyā

ab mehrbāñ hue ho to nā-mehrbāñ na ho

dil ko kahāñ hai sadma-e-rashk-e-adū kī taab

sau imtihāñ haiñ aur ye ik imtihāñ na ho

marnā phaḌak phaḌak ke gavārā sahī magar

itnā to ho qafas meñ ġham-e-āshiyāñ na ho

ka.abe meñ but-kade meñ ḳharābāt meñ rahe

insāñ vo hai kahīñ jo kisī par garāñ na ho

apnī bhī sar-guzasht hai ik-tarfa dāstāñ

barsoñ suno to nisf ye qissa bayāñ na ho

dil se hai dil ko raah ye sach hai agar 'hafīz'

mumkin nahīñ ḳhayāl yahāñ ho vahāñ na ho

qasid KHilaf-e-KHat kahin tera bayan na ho

karna sambhal ke baat ki wo bad-guman na ho

nalon ka mere aaTh-pahr imtihan na ho

Darte nahin ki ek zamin aasman na ho

tohmat ho bhul-chuk ki paighambar ke sar

shikwon ka lutf kya jo koi darmiyan na ho

nalon se laD rahi hai sada-e-jaras jo aaj

gum-karda-rah koi pas-e-karwan na ho

sau sun ke ek bhi na kahen hum baja durust

us se ye kahiye aae ki jis ke zaban na ho

ab tak wo yaad hain meri agli inayaten

bas bas hamare haal pe tu mehrban na ho

chhuTi teri gali to ye mujh ko yaqin hua

jannat hai wo jahan sitam-e-asman na ho

karte hain ek ek se meri shikayaten

sirf is KHayal se ki koi bad-guman na ho

ye kya ki sar chaDha ke nazar se gira diya

ab mehrban hue ho to na-mehrban na ho

dil ko kahan hai sadma-e-rashk-e-adu ki tab

sau imtihan hain aur ye ek imtihan na ho

marna phaDak phaDak ke gawara sahi magar

itna to ho qafas mein gham-e-ashiyan na ho

kabe mein but-kade mein KHarabaat mein rahe

insan wo hai kahin jo kisi par garan na ho

apni bhi sar-guzasht hai ik-tarfa dastan

barson suno to nisf ye qissa bayan na ho

dil se hai dil ko rah ye sach hai agar 'hafiz'

mumkin nahin KHayal yahan ho wahan na ho