qatil hai teri zulf-e-girah-gir ki zanjir

qātil hai tirī zulf-e-girah-gīr kī zanjīr

shamshīr kī shamshīr hai zanjīr kī zanjīr

dīvāna to maiñ huuñ kaf-e-mashshāta meñ vo zulf

ġhairoñ ko milī hai mirī taqdīr kī zanjīr

bhūle nahīñ ham ālam-e-vahshat meñ ibādat

chalne meñ sadā detī hai takbīr kī zanjīr

hai zikr kisī zulf kā har vaqt zabāñ par

ho kyoñ na musalsal mirī taqrīr kī zanjīr

ma.alūm huā aap kā zar-gar hai muhavvis

laayā hai banā kar zar-e-iksīr kī zanjīr

rahm aa gayā jab kāhkashāñ charḳh pe dekhī

bhārī nazar aa.ī mujhe us pair kī zanjīr

rahtī hai bigaḌne pe vahī bid.at-e-zālim

TuuTī to banī āhan-e-shamshīr kī zanjīr

iizā nahīñ dete mire paañv ko salāsil

jaise kisī dīvāna-e-tasvīr kī zanjīr

ai aah kahāñ hai vo tirī quvvat-e-bāzū

toḌe na dar-e-ḳhāna-e-tāsīr kī zanjīr

likhtā hai qalam bas-ki tirī zulf kī tārīf

har satr mire ḳhat meñ hai tahrīr kī zanjīr

huuñ mujrim-e-ulfat mirī ta.azīr yahī hai

ho paañv meñ us zulf-e-girah-gīr kī zanjīr

andesha 'asīr' is liye hai mujh ko ajal se

auroñ ko milegī mirī taqdīr kī zanjīr

qatil hai teri zulf-e-girah-gir ki zanjir

shamshir ki shamshir hai zanjir ki zanjir

diwana to main hun kaf-e-mashshata mein wo zulf

ghairon ko mili hai meri taqdir ki zanjir

bhule nahin hum aalam-e-wahshat mein ibaadat

chalne mein sada deti hai takbir ki zanjir

hai zikr kisi zulf ka har waqt zaban par

ho kyon na musalsal meri taqrir ki zanjir

malum hua aap ka zar-gar hai muhawwis

laya hai bana kar zar-e-iksir ki zanjir

rahm aa gaya jab kahkashan charKH pe dekhi

bhaari nazar aai mujhe us pair ki zanjir

rahti hai bigaDne pe wahi bidat-e-zalim

TuTi to bani aahan-e-shamshir ki zanjir

iza nahin dete mere panw ko salasil

jaise kisi diwana-e-taswir ki zanjir

ai aah kahan hai wo teri quwwat-e-bazu

toDe na dar-e-KHana-e-tasir ki zanjir

likhta hai qalam bas-ki teri zulf ki tarif

har satr mere KHat mein hai tahrir ki zanjir

hun mujrim-e-ulfat meri tazir yahi hai

ho panw mein us zulf-e-girah-gir ki zanjir

andesha 'asir' is liye hai mujh ko ajal se

auron ko milegi meri taqdir ki zanjir