qazi ke munh pe mari hai botal sharab ki

qaazī ke muñh pe maarī hai botal sharāb kī

ye umr bhar meñ ek huī hai savāb kī

ai yaar tere lab pe tabassum nahīñ numūd

paidā hai māh-e-nau se kiran āftāb kī

aayā mizha pe laḳht-e-dil-e-be-qarār yaad

gardish jo ham ne siiḳh pe dekhī kabāb kī

terī kudūratoñ ne mujhe ḳhaak kar diyā

tere ġhubār ne mirī miTTī ḳharāb kī

merī ḳhatā.eñ aa nahīñ saktī shumār meñ

gintī ho kyā tire karam-e-be-hisāb kī

saaqī tire karam se ye ummīd hai mujhe

ho roz-e-hashr haath meñ botal sharāb kī

mastān-e-ishq aa.e ta.allī par ai falak

ab ḳhair maañg tū qadah-e-āftāb kī

nashsha zamīñ se sū-e-falak le uḌā mujhe

saaqī sharāb ne mirī miTTī ḳharāb kī

do roz jā ke ābnā-rūyoñ kī bazm meñ

kyā shakl ho ga.ī dil-e-ḳhāna-ḳharāb kī

bijlī nahīñ taḌaptī hai ai dil ye āsmān

parvāz uḌā rahā hai tire iztirāb kī

abrū kī teġh se jo bachā maiñ to yaar ne

barchhī lagā.ī baḌh ke nigāh-e-itāb kī

allāh re asar mirī baḳht-e-siyah kā

piirī meñ ehtiyāj nahīñ hai ḳhizāb kī

'nāzim' mire gunāh haiñ bāhar hisāb se

tashvīsh kuchh nahīñ mujhe roz-e-hisāb kī

qazi ke munh pe mari hai botal sharab ki

ye umr bhar mein ek hui hai sawab ki

ai yar tere lab pe tabassum nahin numud

paida hai mah-e-nau se kiran aaftab ki

aaya mizha pe laKHt-e-dil-e-be-qarar yaad

gardish jo hum ne siKH pe dekhi kabab ki

teri kuduraton ne mujhe KHak kar diya

tere ghubar ne meri miTTi KHarab ki

meri KHataen aa nahin sakti shumar mein

ginti ho kya tere karam-e-be-hisab ki

saqi tere karam se ye ummid hai mujhe

ho roz-e-hashr hath mein botal sharab ki

mastan-e-ishq aae talli par ai falak

ab KHair mang tu qadah-e-aftab ki

nashsha zamin se su-e-falak le uDa mujhe

saqi sharab ne meri miTTi KHarab ki

do roz ja ke aabna-ruyon ki bazm mein

kya shakl ho gai dil-e-KHana-KHarab ki

bijli nahin taDapti hai ai dil ye aasman

parwaz uDa raha hai tere iztirab ki

abru ki tegh se jo bacha main to yar ne

barchhi lagai baDh ke nigah-e-itab ki

allah re asar meri baKHt-e-siyah ka

piri mein ehtiyaj nahin hai KHizab ki

'nazim' mere gunah hain bahar hisab se

tashwish kuchh nahin mujhe roz-e-hisab ki