qabr se qahr ke aasar nikal aate hain

qabr se qahr ke āsār nikal aate haiñ

ḳhānqāhoñ meñ bhī darbār nikal aate haiñ

uḌtī paḌtī huī be-kār sī afvāhoñ par

surḳhiyāñ oḌh ke aḳhbār nikal aate haiñ

ġham ke sailāb meñ ham Dūbte itrāte haiñ

kabhī us paar to is paar nikal aate haiñ

itnī māyūsī hai ab zaḳhm ke bāzāroñ meñ

āñsuoñ ke bhī ḳharīdār nikal aate haiñ

vo to jaañ le ke musallam haiñ vafādārī meñ

ham to sar de ke bhī ġhaddār nikal aate haiñ

jab bhī aḌ jaate haiñ har haal meñ bai.at pe yazīd

phir kafan oḌh ke inkār nikal aate haiñ

vo mohabbat ho siyāsat ho ki ho amn ki jañg

ab to har moḌ pe bāzār nikal aate haiñ

ġham meñ Duubī huī bad-hāl sī sachchā.ī par

laḌkhaḌāte hue ash.ār nikal aate haiñ

qabr se qahr ke aasar nikal aate hain

KHanqahon mein bhi darbar nikal aate hain

uDti paDti hui be-kar si afwahon par

surKHiyan oDh ke aKHbar nikal aate hain

gham ke sailab mein hum Dubte itraate hain

kabhi us par to is par nikal aate hain

itni mayusi hai ab zaKHm ke bazaron mein

aansuon ke bhi KHaridar nikal aate hain

wo to jaan le ke musallam hain wafadari mein

hum to sar de ke bhi ghaddar nikal aate hain

jab bhi aD jate hain har haal mein baiat pe yazid

phir kafan oDh ke inkar nikal aate hain

wo mohabbat ho siyasat ho ki ho amn ki jang

ab to har moD pe bazar nikal aate hain

gham mein Dubi hui bad-haal si sachchai par

laDkhaDate hue ashaar nikal aate hain