qad-e-sanam sa agar aafrida hona tha

qad-e-sanam sā agar āfrīda honā thā

na sarv-e-bāġh ko itnā kashīda honā thā

huā hai zulf se gustāḳh kis qadar shāna

hamāre paas bhī dast-e-burīda honā thā

na khīñchnā thā zuleḳhā ko dāman-e-yūsuf

usī kā parda-e-ismat darīda honā thā

diyā na saath jo sabr-o-qarār ne na diyā

ravāna mulk-e-adam ko jarīda honā thā

miTā.e se koī miTtā hai bātiloñ ke haq

kuchh iḳhtiyār se kyā barguzīda honā thā

na jāntā thā ġhazab hai nigah kā tiir ai dil

tujhī ko sāmne āfat-rasīda honā thā

rulātā shām-o-sahar kis tarah na tāle-e-past

buland sar se mire āb-dīda honā thā

gurez-e-yār ne barbād kar diyā ham ko

ġhubār-e-rāh ġhazāl-e-ramīda honā thā

na aa.ī dāman-e-dāya meñ niiñd ai 'ātish'

darūn-e-dāman-e-ḳhāk āramīda honā thā

qad-e-sanam sa agar aafrida hona tha

na sarw-e-bagh ko itna kashida hona tha

hua hai zulf se gustaKH kis qadar shana

hamare pas bhi dast-e-burida hona tha

na khinchna tha zuleKHa ko daman-e-yusuf

usi ka parda-e-ismat darida hona tha

diya na sath jo sabr-o-qarar ne na diya

rawana mulk-e-adam ko jarida hona tha

miTae se koi miTta hai baatilon ke haq

kuchh iKHtiyar se kya barguzida hona tha

na jaanta tha ghazab hai nigah ka tir ai dil

tujhi ko samne aafat-rasida hona tha

rulata sham-o-sahar kis tarah na tale-e-past

buland sar se mere aab-dida hona tha

gurez-e-yar ne barbaad kar diya hum ko

ghubar-e-rah ghazal-e-ramida hona tha

na aai daman-e-daya mein nind ai 'atish'

darun-e-daman-e-KHak aaramida hona tha