qad khinche hai jis waqt to hai turfa-bala tu

qad khīñche hai jis vaqt to hai turfa-balā tū

kahtā hai tirā saaya parī se ki hai kyā tū

gar apnī ravish raah chalā yaar to ai kabk

rah jā.egā dīvār-e-gulistāñ se lagā tū

be-gul nahīñ bulbul tujhe bhī chain pa dekheñ

mar rahte haiñ ham ek taraf baaġh meñ yā tū

ḳhush-rū hai bahut ai gul-e-tar tū bhī va-lekin

insāf hai muñh tere hī vaisā hai bhalā tū

kyā jāniye ai gauhar-e-maqsad tū kahāñ hai

ham ḳhaak meñ bhī mil ga.e lekin na milā tū

is jiine se ab dil ko uThā baiTheñge ham bhī

hai tujh ko qasam zulm se mat haath uThā tū

manzar meñ badan ke bhī ye ek turfa-makāñ thā

afsos ki Tuk dil meñ hamāre na rahā tū

the chaak garebān gulistāñ meñ guloñ ke

niklā hai magar khole hue band-e-qabā tū

be-hoshī sī aatī hai tujhe us kī galī meñ

gar ho sake ai 'mīr' to us raah na jā tū

qad khinche hai jis waqt to hai turfa-bala tu

kahta hai tera saya pari se ki hai kya tu

gar apni rawish rah chala yar to ai kabk

rah jaega diwar-e-gulistan se laga tu

be-gul nahin bulbul tujhe bhi chain pa dekhen

mar rahte hain hum ek taraf bagh mein ya tu

KHush-ru hai bahut ai gul-e-tar tu bhi wa-lekin

insaf hai munh tere hi waisa hai bhala tu

kya jaaniye ai gauhar-e-maqsad tu kahan hai

hum KHak mein bhi mil gae lekin na mila tu

is jine se ab dil ko uTha baiThenge hum bhi

hai tujh ko qasam zulm se mat hath uTha tu

manzar mein badan ke bhi ye ek turfa-makan tha

afsos ki Tuk dil mein hamare na raha tu

the chaak gareban gulistan mein gulon ke

nikla hai magar khole hue band-e-qaba tu

be-hoshi si aati hai tujhe us ki gali mein

gar ho sake ai 'mir' to us rah na ja tu