qad sab ke unki bazm mein kam kar diye gae

qad sab ke un kī bazm meñ kam kar diye ga.e

jo sar nahīñ jhuke vo qalam kar diye ga.e

chehroñ pe hādsāt raqam kar diye ga.e

sab ḳhush-mizāj vaqf-e-alam kar diye ga.e

qahr-e-ḳhudā huā to koī uf na kar sakā

saare vajūd pal meñ adam kar diye ga.e

jo saath saath chal na sake vaqt ke yahāñ

vo log sirf naqsh-e-qadam kar diye ga.e

har be-zamīr shaḳhs ne ḳhushiyāñ sameT liiñ

hamrāh ahl-e-zarf ke ġham kar diye ga.e

'ārif' darūn-e-ka.aba kabhī but bhī the magar

ma.atūb saare ahl-e-haram kar diye ga.e

qad sab ke un ki bazm mein kam kar diye gae

jo sar nahin jhuke wo qalam kar diye gae

chehron pe hadsat raqam kar diye gae

sab KHush-mizaj waqf-e-alam kar diye gae

qahr-e-KHuda hua to koi uf na kar saka

sare wajud pal mein adam kar diye gae

jo sath sath chal na sake waqt ke yahan

wo log sirf naqsh-e-qadam kar diye gae

har be-zamir shaKHs ne KHushiyan sameT lin

hamrah ahl-e-zarf ke gham kar diye gae

'arif' darun-e-kaba kabhi but bhi the magar

matub sare ahl-e-haram kar diye gae