qad se kuchh mawara charagh jale

qad se kuchh māvarā charāġh jale

palkeñ uTheñ vo yā charāġh jale

tīrgī ḳhatm ho nahīñ rahī dost

dūsrā tīsrā charāġh jale

jal uThā huuñ maiñ hai añdherā kahāñ

kah rahā thā baḌā charāġh jale

yuuñ bujhā hai ki dil ye chāhtā hai

aur ik martaba charāġh jale

ghup añdhere meñ āñkheñ raushan haiñ

ab yahāñ aur kyā charāġh jale

sab ne bai.at añdheroñ se kar lī

aur maiñ kahtā rahā charāġh jale

vasl ho to charāġhāñ bhī kar leñ

hijr kī raat kyā charāġh jale

merā aur us kā vāqi.a yuuñ hai

jab huā sāmnā charāġh jale

aa.ina rakh ke sāmne dekhā

aa.ine meñ sivā charāġh jale

zau purāne diyoñ kī kam nahīñ par

ik zarā sā nayā charāġh jale

baat lekin mirī sunī na ga.ī

maiñ ne chāhā bhī thā charāġh jale

mujh ko jaltā makāñ dikhā.ī diyā

maiñ ne kī thī duā charāġh jale

aise jaltā hai aaj dil merā

jis tarah 'mīr' kā charāġh jale

ruḳh havā ne badal liyā apnā

faisla ho gayā charāġh jale

mujh ko jalne meñ aar kab hai magar

yuuñ jalā jis tarah charāġh jale

apne hisse kā jal-bujhā 'zīshān'

ab koī dūsrā charāġh jale

qad se kuchh mawara charagh jale

palken uThen wo ya charagh jale

tirgi KHatm ho nahin rahi dost

dusra tisra charagh jale

jal uTha hun main hai andhera kahan

kah raha tha baDa charagh jale

yun bujha hai ki dil ye chahta hai

aur ek martaba charagh jale

ghup andhere mein aankhen raushan hain

ab yahan aur kya charagh jale

sab ne baiat andheron se kar li

aur main kahta raha charagh jale

wasl ho to charaghan bhi kar len

hijr ki raat kya charagh jale

mera aur us ka waqia yun hai

jab hua samna charagh jale

aaina rakh ke samne dekha

aaine mein siwa charagh jale

zau purane diyon ki kam nahin par

ek zara sa naya charagh jale

baat lekin meri suni na gai

main ne chaha bhi tha charagh jale

mujh ko jalta makan dikhai diya

main ne ki thi dua charagh jale

aise jalta hai aaj dil mera

jis tarah 'mir' ka charagh jale

ruKH hawa ne badal liya apna

faisla ho gaya charagh jale

mujh ko jalne mein aar kab hai magar

yun jala jis tarah charagh jale

apne hisse ka jal-bujha 'zishan'

ab koi dusra charagh jale