qadam na rakh meri chashm-e-pur-ab ke ghar mein

qadam na rakh mirī chashm-e-pur-āb ke ghar meñ

bharā hai mauj kā tūfāñ habāb ke ghar meñ

kahe hai dekh ke vo aks-e-ruḳh ba-sāġhar-e-mai

nuzūl-e-māh huā āftāb ke ghar meñ

mudām rind kareñ kyuuñ na āstāñ-bosī

haram hai shaiḳh-e-mashīḳhat-ma.āb ke ghar meñ

hamāre dil meñ kahāñ aable haiñ ai saaqī

chune hue haiñ ye shīshe sharāb ke ghar meñ

taḌap ko dekh mire dil kī barq-e-ātish-bār

ḳhajil ho chhup ga.ī āḳhir sahāb ke ghar meñ

dilā na kyūñke karūñ iḳhtilāt kī bāteñ

hijāb kyā hai ab us be-hijāb ke ghar meñ

'nasīr' dekh to kyā jalva-e-ḳhudā.ī hai

hamāre us but-e-ḳhāna-ḳharāb ke ghar meñ

qadam na rakh meri chashm-e-pur-ab ke ghar mein

bhara hai mauj ka tufan habab ke ghar mein

kahe hai dekh ke wo aks-e-ruKH ba-saghar-e-mai

nuzul-e-mah hua aaftab ke ghar mein

mudam rind karen kyun na aastan-bosi

haram hai shaiKH-e-mashiKHat-maab ke ghar mein

hamare dil mein kahan aable hain ai saqi

chune hue hain ye shishe sharab ke ghar mein

taDap ko dekh mere dil ki barq-e-atish-bar

KHajil ho chhup gai aaKHir sahab ke ghar mein

dila na kyunke karun iKHtilat ki baaten

hijab kya hai ab us be-hijab ke ghar mein

'nasir' dekh to kya jalwa-e-KHudai hai

hamare us but-e-KHana-KHarab ke ghar mein