qadam qadam ka ilaqa hai na-rawa tak hai

qadam qadam kā ilāqa hai nā-ravā tak hai

fusūn-e-jaur-o-jafā pesha jā-ba-jā tak hai

gar ek baar kā honā alam ġhanīmat thā

sitam to ye hai ki dar-pesh bār-hā tak hai

diye kī lau se nahīñ vāsta kisī kā koī

agar kisī kā koī hai to phir havā tak hai

amal hai ḳhud pe amal-dār tā dam-e-mauqūf

aur is kā radd-e-amal apne iltavā tak hai

sadā-e-shor-o-shaġhab hai idhar samā.at tak

shunīd gird o javānib idhar sadā tak hai

magar ye kaun batā.e safar-e-navardoñ ko

ki had dasht-e-junūñ un ke iktifā tak hai

ai be-qarāri-e-dil mujh ko ye ḳhabar hī na thī

ki jo qarār kī sarhad hai ittiqā tak hai

ḳhudā se baad meñ rakkhe hue hai duniyā ko

vo fāsla jo hathelī se ik duā tak hai

kahīñ pare kī hai hājat-ravā.ī se merī

mirā savāl zarūrat se māvarā tak hai

hai tū hī aañkh mirī ai jamāl-e-pesh-e-nazar

so ye tamāsha mirā ik tirī razā tak hai

nahīñ hai koī bhī hatmī yahāñ had-e-mālūm

har ek intihā ik aur intihā tak hai

qadam qadam ka ilaqa hai na-rawa tak hai

fusun-e-jaur-o-jafa pesha ja-ba-ja tak hai

gar ek bar ka hona alam ghanimat tha

sitam to ye hai ki dar-pesh bar-ha tak hai

diye ki lau se nahin wasta kisi ka koi

agar kisi ka koi hai to phir hawa tak hai

amal hai KHud pe amal-dar ta dam-e-mauquf

aur is ka radd-e-amal apne iltawa tak hai

sada-e-shor-o-shaghab hai idhar samaat tak

shunid gird o jawanib idhar sada tak hai

magar ye kaun batae safar-e-nawardon ko

ki had dasht-e-junun un ke iktifa tak hai

ai be-qarari-e-dil mujh ko ye KHabar hi na thi

ki jo qarar ki sarhad hai ittiqa tak hai

KHuda se baad mein rakkhe hue hai duniya ko

wo fasla jo hatheli se ek dua tak hai

kahin pare ki hai hajat-rawai se meri

mera sawal zarurat se mawara tak hai

hai tu hi aankh meri ai jamal-e-pesh-e-nazar

so ye tamasha mera ek teri raza tak hai

nahin hai koi bhi hatmi yahan had-e-malum

har ek intiha ek aur intiha tak hai