qadam-qadam pe ajab zalzale machalte hue

qadam-qadam pe ajab zalzale machalte hue

laraz laraz gayā tūl-e-safar se Darte hue

sunā rahā thā vo mujh ko ajab ajab bāteñ

badan kā āḳhirī ziina magar utarte hue

vo āsmān ki jis se gumān aajiz thā

zamīn aisī ki Dartā huuñ paaoñ dharte hue

na koī saaya hī utrā na ġham kī raat kaTī

guzar ga.iiñ ka.ī sadiyāñ havā se laḌte hue

yahī nahīñ ki maiñ saffāk jhuuT bolā thā

use bhī ḳhauf na thā sāmne mukarte hue

ye kaun duur haTā mere paas aate hue

ye kaun aa gayā mujh meñ mujh hī se Darte hue

maiñ us ke vāste ek dasht-e-ḳhaufnāk rahā

vo paar kartā mujhe kyā havā se Darte hue

bas ek ashk thā raushan jabīñ sitārā sā

bas ek phuul thā bistar pe shab guzarte hue

nasha ajiib mire harf-e-tez-tez meñ thā

vo TuuT TuuT gayā sher meñ utarte hue

jo ek harf mire ġham kā ism-e-āzam thā

usī ko kho diyā sab kuchh bayān karte hue

umañD rahā thā vo ik mauj-e-tah-nashīñ kī tarah

simaT rahā thā maiñ chāroñ taraf bikharte hue

vo hādisa kisī dīvār kī talāsh meñ thā

hazār dar the magar jaan meñ larazte hue

thamā gayā mire hāthoñ meñ jo dam-e-ruḳhsat

is aa.ine ko zarā dekh tū sañvarte hue

qadam-qadam pe ajab zalzale machalte hue

laraz laraz gaya tul-e-safar se Darte hue

suna raha tha wo mujh ko ajab ajab baaten

badan ka aaKHiri zina magar utarte hue

wo aasman ki jis se guman aajiz tha

zamin aisi ki Darta hun paon dharte hue

na koi saya hi utra na gham ki raat kaTi

guzar gain kai sadiyan hawa se laDte hue

yahi nahin ki main saffak jhuT bola tha

use bhi KHauf na tha samne mukarte hue

ye kaun dur haTa mere pas aate hue

ye kaun aa gaya mujh mein mujh hi se Darte hue

main us ke waste ek dasht-e-KHaufnak raha

wo par karta mujhe kya hawa se Darte hue

bas ek ashk tha raushan jabin sitara sa

bas ek phul tha bistar pe shab guzarte hue

nasha ajib mere harf-e-tez-tez mein tha

wo TuT TuT gaya sher mein utarte hue

jo ek harf mere gham ka ism-e-azam tha

usi ko kho diya sab kuchh bayan karte hue

umanD raha tha wo ek mauj-e-tah-nashin ki tarah

simaT raha tha main chaaron taraf bikharte hue

wo hadisa kisi diwar ki talash mein tha

hazar dar the magar jaan mein larazte hue

thama gaya mere hathon mein jo dam-e-ruKHsat

is aaine ko zara dekh tu sanwarte hue