qadam qadam pe mera hausla baDhata hua

qadam qadam pe mirā hausla baḌhātā huā

koī charāġh sar-e-rāh jhilmilātā huā

mujhe ye hukm ki sūraj ke saath saath chalūñ

agarche qatra-e-shabnam huuñ thartharātā huā

ajiib ḳhauf kā aaseb sar pe raqsāñ hai

guzar rahā huuñ maiñ ḳhud se nazar bachātā huā

maiñ tishnagī kā vo sahrā ki buuñd ko tarsūñ

tū ābshār kī mānind gungunātā huā

kahīñ ġharīb ke chhappar meñ siskiyāñ aaheñ

kahīñ sitāroñ se dāman koī sajātā huā

nafas-nafas meñ havā bādbān khīñchtī hai

nazar-nazar koī tūfāñ hai sar uThātā huā

mire ḳhayāl ke āfāq-e-nau meñ raqs-kunāñ

chaman mahaktā huā shahr jagmagātā huā

ḳhizāñ kī aañkh kā shahtīr ban gayā hai 'ayāz'

ye ik gulāb sar-e-shāḳh lahlahātā huā

qadam qadam pe mera hausla baDhata hua

koi charagh sar-e-rah jhilmilata hua

mujhe ye hukm ki suraj ke sath sath chalun

agarche qatra-e-shabnam hun thartharaata hua

ajib KHauf ka aaseb sar pe raqsan hai

guzar raha hun main KHud se nazar bachata hua

main tishnagi ka wo sahra ki bund ko tarsun

tu aabshaar ki manind gungunata hua

kahin gharib ke chhappar mein siskiyan aahen

kahin sitaron se daman koi sajata hua

nafas-nafas mein hawa baadban khinchti hai

nazar-nazar koi tufan hai sar uThata hua

mere KHayal ke aafaq-e-nau mein raqs-kunan

chaman mahakta hua shahr jagmagata hua

KHizan ki aankh ka shahtir ban gaya hai 'ayaz'

ye ek gulab sar-e-shaKH lahlahata hua