qadam qadam pe naya imtihan hai mere liye

qadam qadam pe nayā imtihāñ hai mere liye

ye shahr aaj bhī ik haft-ḳhvāñ hai mere liye

nahīñ hai ab koī ehsās-e-roz-o-shab bhī mujhe

bas ek arsa-e-paikār-e-jāñ hai mere liye

na rahguzār-e-shajar-dār hai na āb-o-sahāb

ye tez dhuup ye sahrā-e-jāñ hai mere liye

maiñ ik sitāra huuñ us ke falak se TuuTā huā

vo dhund hotī huī kahkashāñ hai mere liye

sameT letī hai mujh ko maiñ TūTā-phūTā sahī

ye raat ḳhirqa-e-āvārgāñ hai mere liye

mahakte rahte haiñ ḳhvāboñ meñ hijratoñ ke gulāb

na.ī zamīn nayā āsmāñ hai mere liye

ubuur karnā hai dariyā-e-shor mujh ko 'kamāl'

aur ek kashtī-e-be-bādbāñ hai mere liye

qadam qadam pe naya imtihan hai mere liye

ye shahr aaj bhi ek haft-KHwan hai mere liye

nahin hai ab koi ehsas-e-roz-o-shab bhi mujhe

bas ek arsa-e-paikar-e-jaan hai mere liye

na rahguzar-e-shajar-dar hai na aab-o-sahab

ye tez dhup ye sahra-e-jaan hai mere liye

main ek sitara hun us ke falak se TuTa hua

wo dhund hoti hui kahkashan hai mere liye

sameT leti hai mujh ko main TuTa-phuTa sahi

ye raat KHirqa-e-awargan hai mere liye

mahakte rahte hain KHwabon mein hijraton ke gulab

nai zamin naya aasman hai mere liye

ubur karna hai dariya-e-shor mujh ko 'kamal'

aur ek kashti-e-be-baadban hai mere liye