qadam qadam pe wafa ka dayar rah mein hai

qadam qadam pe vafā kā dayār raah meñ hai

ḳhushā ki naqsh-e-kaf-e-pā-e-yār raah meñ hai

har ek mauj meñ sāz-e-fareb hai jis kī

vo ik sarāb ba-har-e'tibār raah meñ hai

ye uḌ rahī hai jo ḳhūñ-rañg ḳhaak har jānib

kisī shahīd-e-junūñ kā mazār raah meñ hai

na koī baat na maqsad na aarzū na savāl

bas ek ġhalġhala-e-gīr-o-dār raah meñ hai

sukūn-e-shab hama naġhma fazā-e-shab hama nuur

magar abhī koī shab-zinda-dār raah meñ hai

pahuñch chuke haiñ idhar ham-safar sar-e-manzil

udhar abhī ḳhalish-e-intizār raah meñ hai

qadam qadam pe garebāñ qadam qadam pe lahū

yahī to ek subūt-e-bahār raah meñ hai

tirī talab ke taqāze tire husūl ke ḳhvāb

tirī talāsh bahar-e'tibār raah meñ hai

qadam qadam pe wafa ka dayar rah mein hai

KHusha ki naqsh-e-kaf-e-pa-e-yar rah mein hai

har ek mauj mein saz-e-fareb hai jis ki

wo ek sarab ba-har-e'tibar rah mein hai

ye uD rahi hai jo KHun-rang KHak har jaanib

kisi shahid-e-junun ka mazar rah mein hai

na koi baat na maqsad na aarzu na sawal

bas ek ghalghala-e-gir-o-dar rah mein hai

sukun-e-shab hama naghma faza-e-shab hama nur

magar abhi koi shab-zinda-dar rah mein hai

pahunch chuke hain idhar ham-safar sar-e-manzil

udhar abhi KHalish-e-intizar rah mein hai

qadam qadam pe gareban qadam qadam pe lahu

yahi to ek subut-e-bahaar rah mein hai

teri talab ke taqaze tere husul ke KHwab

teri talash bahar-e'tibar rah mein hai