qadam se KHak bhi uDi to chandni chhiTak gai

qadam se ḳhaak bhī uḌī to chāñdnī chhiTak ga.ī

jidhar se vo guzar ga.e vo rahguzar mahak ga.ī

havā-e-ġham ne barg-e-ḳhushk kī tarah hilā diyā

charāġh kī tarah ye zindagī bhaḌak bhaḌak ga.ī

tirā ḳhayāl raah meñ charāġh le kar aa gayā

uThā kuchh aisā dil meñ dard zindagī chamak ga.ī

us ek buuñd meñ ḳhazāna-e-qarār thā mirā

vo ek buuñd ḳhud-ba-ḳhud jo aañkh se chhalak ga.ī

diloñ meñ jab judā.ī thī to koī jāntā na thā

zabān par jab aa.ī thī to baat duur tak ga.ī

jamāl-e-dil-fareb se haTī thī ik zarā nazar

vo hañs ke pūchhne lage nigāh-e-shauq thak ga.ī

ta.alluqāt kyā nahīñ havā se 'vājid' aap ke

chalī jo saath aap ke to rāsta bhaTak ga.ī

qadam se KHak bhi uDi to chandni chhiTak gai

jidhar se wo guzar gae wo rahguzar mahak gai

hawa-e-gham ne barg-e-KHushk ki tarah hila diya

charagh ki tarah ye zindagi bhaDak bhaDak gai

tera KHayal rah mein charagh le kar aa gaya

uTha kuchh aisa dil mein dard zindagi chamak gai

us ek bund mein KHazana-e-qarar tha mera

wo ek bund KHud-ba-KHud jo aankh se chhalak gai

dilon mein jab judai thi to koi jaanta na tha

zaban par jab aai thi to baat dur tak gai

jamal-e-dil-fareb se haTi thi ek zara nazar

wo hans ke puchhne lage nigah-e-shauq thak gai

talluqat kya nahin hawa se 'wajid' aap ke

chali jo sath aap ke to rasta bhaTak gai