قدم اٹھاتے ہی چکرا کے گر پڑیں ہم بھی

قدم اٹھاتے ہی چکرا کے گر پڑیں ہم بھی

تمہاری طرح سنبھل کے اگر چلیں ہم بھی

پسینے پونچھ رہی ہے ہوا درختوں کے

تھکن کی گرد کہیں رک کے جھاڑ لیں ہم بھی

وہ لکھ رہے ہیں اندھیرے میں کچھ ہتھیلی پر

اجالا ہو تو ذرا غور سے پڑھیں ہم بھی

بدل کے بھیس حریفوں کی فوج نکلی ہے

کسی طرح کا کوئی روپ دھار لیں ہم بھی

ٹھہر گئی ہے کڑی دھوپ ایک مرکز پر

دبیز چھاؤں ملے تو کہیں رکیں ہم بھی

فصیل لب پہ جڑے ہیں سکوت کے شیشے

زباں کو زخم لگائیں تو کچھ کہیں ہم بھی