qadam zamin pe na the rah hum badalte kya

qadam zamīñ pe na the raah ham badalte kyā

havā bañdhī thī yahāñ piiTh par sambhalte kyā

phir us ke hāthoñ hameñ apnā qatl bhī thā qubūl

ki aa chuke the qarīb itne bach nikalte kyā

yahī samajh ke vahāñ se maiñ ho liyā ruḳhsat

vo chalte saath magar duur tak to chalte kyā

tamām shahr thā ik mom kā ajā.ib-ghar

chaḌhā jo din to ye manzar na phir pighalte kyā

vo āsmāñ the ki āñkheñ sameTtīñ kaise

vo ḳhvāb the ki mirī zindagī meñ Dhalte kyā

nibāhane kī use bhī thī aarzū to bahut

havā hī tez thī itnī charāġh jalte kyā

uThe aur uTh ke use jā sunāyā dukh apnā

ki saarī raat paḌe karvaTeñ badalte kyā

na ābrū-e-ta.alluq hī jab rahī 'bānī'

baġhair baat kiye ham vahāñ se Talte kyā

qadam zamin pe na the rah hum badalte kya

hawa bandhi thi yahan piTh par sambhalte kya

phir us ke hathon hamein apna qatl bhi tha qubul

ki aa chuke the qarib itne bach nikalte kya

yahi samajh ke wahan se main ho liya ruKHsat

wo chalte sath magar dur tak to chalte kya

tamam shahr tha ek mom ka ajaib-ghar

chaDha jo din to ye manzar na phir pighalte kya

wo aasman the ki aankhen sameTtin kaise

wo KHwab the ki meri zindagi mein Dhalte kya

nibahane ki use bhi thi aarzu to bahut

hawa hi tez thi itni charagh jalte kya

uThe aur uTh ke use ja sunaya dukh apna

ki sari raat paDe karwaTen badalte kya

na aabru-e-talluq hi jab rahi 'bani'

baghair baat kiye hum wahan se Talte kya