qadim alfaz mein mani ki jiddat mang lete hain

qadīm alfāz meñ ma.anī kī jiddat maañg lete haiñ

ham apne rang se kasrat meñ vahdat maañg lete haiñ

zarūrat ho na ho is se bhalā kyā farq paḌtā hai

jinheñ ho māñgnā vo hasb-e-ādat maañg lete haiñ

rivāyat ye purānī hai hamārī ḳhāndānī se

ki apne ghar se baḌh kar dil meñ vus.at maañg lete haiñ

hameñ lā-ilm rakhte haiñ hamesha apne baare meñ

vo ham se saarī bātoñ kī vazāhat maañg lete haiñ

ab un se iḳhtilāf-e-rā.e kā haq to mayassar ho

ki jo dastār de kar sar salāmat maañg lete haiñ

judā.ī kī kaḌī ghaḌiyāñ ye zālim hijr ke mausam

ḳhushī ke chand lamhoñ kī bhī qīmat maañg lete haiñ

abhī ham ḳhairiyat bhī pūchhne paate nahīñ un kī

aur aate hī vo jaane kī ijāzat maañg lete haiñ

qadim alfaz mein mani ki jiddat mang lete hain

hum apne rang se kasrat mein wahdat mang lete hain

zarurat ho na ho is se bhala kya farq paDta hai

jinhen ho mangna wo hasb-e-adat mang lete hain

riwayat ye purani hai hamari KHandani se

ki apne ghar se baDh kar dil mein wusat mang lete hain

hamein la-ilm rakhte hain hamesha apne bare mein

wo hum se sari baaton ki wazahat mang lete hain

ab un se iKHtilaf-e-rae ka haq to mayassar ho

ki jo dastar de kar sar salamat mang lete hain

judai ki kaDi ghaDiyan ye zalim hijr ke mausam

KHushi ke chand lamhon ki bhi qimat mang lete hain

abhi hum KHairiyat bhi puchhne pate nahin un ki

aur aate hi wo jaane ki ijazat mang lete hain