qadr-e-wafa bhi hogi kisi din jafa ke baad

qadr-e-vafā bhī hogī kisī din jafā ke ba.ad

lā.egā rañg-e-ḳhūn-e-shahīdāñ hinā ke ba.ad

hotā hai inqalāb jahāñ har adā ke ba.ad

bebāk bhī banoge kabhī tum hayā ke ba.ad

laa.e haiñ phuul ahl-e-mohabbat kī qabr par

kyā yaad aa gayā unheñ tark-e-jafā ke ba.ad

ka.abe meñ mujh se shān-e-butāñ pūchhte ho shaiḳh

tauba meñ un kā zikr karūñgā ḳhudā ke ba.ad

un kī kamar kā koī pata hī nahīñ kahīñ

ye dūsrā tilism-e-nazar hai humā ke ba.ad

baiThī hai le ke ab mujhe āġhosh meñ zamīñ

ārām se huuñ kunj-e-lahad meñ qazā ke ba.ad

ahl-e-vafā milegā na mujh sā jahān meñ

pachhtā.eñge vo 'auj' ḳhud āḳhir jafā ke ba.ad

qadr-e-wafa bhi hogi kisi din jafa ke baad

laega rang-e-KHun-e-shahidan hina ke baad

hota hai inqalab jahan har ada ke baad

bebak bhi banoge kabhi tum haya ke baad

lae hain phul ahl-e-mohabbat ki qabr par

kya yaad aa gaya unhen tark-e-jafa ke baad

kabe mein mujh se shan-e-butan puchhte ho shaiKH

tauba mein un ka zikr karunga KHuda ke baad

un ki kamar ka koi pata hi nahin kahin

ye dusra tilism-e-nazar hai huma ke baad

baiThi hai le ke ab mujhe aaghosh mein zamin

aaram se hun kunj-e-lahad mein qaza ke baad

ahl-e-wafa milega na mujh sa jahan mein

pachhtaenge wo 'auj' KHud aaKHir jafa ke baad