qafas ki tiliyan hain aur main hun

qafas kī tīliyāñ haiñ aur maiñ huuñ

vatan se dūriyāñ haiñ aur maiñ huuñ

vahī pahle ke jaisī be-qarārī

vahī be-ḳhvābiyāñ haiñ aur maiñ huuñ

muqayyad ahd-e-māzī ke khañDar meñ

mirī ḳhush-fahmiyāñ haiñ aur maiñ huuñ

na jugnū hai na hai koī sitārā

ajab tārīkiyāñ haiñ aur maiñ huuñ

mirī tārīk rātoñ ke mushāhid

jharoke khiḌkiyāñ haiñ aur maiñ huuñ

mire ghar meñ barā.e-ham-navā.ī

mirī tanhā.iyāñ haiñ aur maiñ huuñ

vahī nāsāzī-e-qismat kī mujh par

karam-farmā.iyāñ haiñ aur maiñ huuñ

na badlā hai na badlegā ye lahja

vahī be-bākiyāñ haiñ aur maiñ huuñ

vahī hālāt se jehd-e-musalsal

vahī nākāmiyāñ haiñ aur maiñ huuñ

qafas ki tiliyan hain aur main hun

watan se duriyan hain aur main hun

wahi pahle ke jaisi be-qarari

wahi be-KHwabiyan hain aur main hun

muqayyad ahd-e-mazi ke khanDar mein

meri KHush-fahmiyan hain aur main hun

na jugnu hai na hai koi sitara

ajab tarikiyan hain aur main hun

meri tarik raaton ke mushahid

jharoke khiDkiyan hain aur main hun

mere ghar mein barae-ham-nawai

meri tanhaiyan hain aur main hun

wahi nasazi-e-qismat ki mujh par

karam-farmaiyan hain aur main hun

na badla hai na badlega ye lahja

wahi be-bakiyan hain aur main hun

wahi haalat se jehd-e-musalsal

wahi nakaamiyan hain aur main hun