qafas ko le ke uDna paD raha hai

qafas ko le ke uḌnā paḌ rahā hai

ye saudā mujh ko mahñgā paḌ rahā hai

mirī har ik masāfat rā.egāñ thī

mujhe taslīm karnā paḌ rahā hai

sunā hai ek jaadū hai mohabbat

ye jaadū hai to ulTā paḌ rahā hai

mohabbat hai hameñ ik dūsre se

ye aapas meñ batānā paḌ rahā hai

jo rahnā chāhtā hai lā-ta.alluq

ta.alluq us se rakhnā paḌ rahā hai

samajhtī thī bahut āsān jin ko

unhīñ kāmoñ meñ raḳhna paḌ rahā hai

huī jaatī hai phir kyuuñ duur manzil

mirā paañv to sīdhā paḌ rahā hai

maiñ kin logoñ se milnā chāhtī thī

ye kin logoñ se milnā paḌ rahā hai

maiñ ab tak mar nahīñ paa.ī huuñ 'shabnam'

so ab tak mujh ko jiinā paḌ rahā hai

qafas ko le ke uDna paD raha hai

ye sauda mujh ko mahnga paD raha hai

meri har ek masafat raegan thi

mujhe taslim karna paD raha hai

suna hai ek jadu hai mohabbat

ye jadu hai to ulTa paD raha hai

mohabbat hai hamein ek dusre se

ye aapas mein batana paD raha hai

jo rahna chahta hai la-talluq

talluq us se rakhna paD raha hai

samajhti thi bahut aasan jin ko

unhin kaamon mein raKHna paD raha hai

hui jati hai phir kyun dur manzil

mera panw to sidha paD raha hai

main kin logon se milna chahti thi

ye kin logon se milna paD raha hai

main ab tak mar nahin pai hun 'shabnam'

so ab tak mujh ko jina paD raha hai