qafas mein ashk-e-hasrat par madar-e-zindagani hai

qafas meñ ashk-e-hasrat par madār-e-zindagānī hai

yahī daane kā daanā hai yahī paanī kā paanī hai

mile the aaj barsoñ meñ magar allāh kī qudarat

vahī sūrat vahī rañgat vahī josh-e-javānī hai

hameñ vo jaan bhī leñge hameñ pahchān bhī leñge

utar jā.egā sab nashsha abhī chaḌhtī javānī hai

kaleje se lagā rakhkhūñ na kyuuñ dard-e-judā.ī ko

yahī to ik dil-e-marhūm kī baaqī nishānī hai

ye sach hai yā ġhalat ham ne sunā hai marne vāloñ se

tire ḳhanjar meñ qātil chashma-e-haivāñ kā paanī hai

batā.e jaate haiñ ausāf vo apnī adāoñ ke

ye shān-e-dil-raubā.ī hai ye tarz-e-jāñ-satānī hai

yahāñ kyā jāniye kis tarah dekhā hai tasavvur meñ

vahāñ ab tak vahī parde ke andar lan-tarānī hai

kareñ tasḳhīr aao mil ke ham tum donoñ aalam ko

idhar jādū-nigāhī hai udhar jādū-bayānī hai

'jalīl' ik sher bhī ḳhālī na paayā dard o hasrat se

ġhazal-ḳhvānī nahīñ ye dar-haqīqat nauha-ḳhvānī hai

qafas mein ashk-e-hasrat par madar-e-zindagani hai

yahi dane ka dana hai yahi pani ka pani hai

mile the aaj barson mein magar allah ki qudarat

wahi surat wahi rangat wahi josh-e-jawani hai

hamein wo jaan bhi lenge hamein pahchan bhi lenge

utar jaega sab nashsha abhi chaDhti jawani hai

kaleje se laga rakhkhun na kyun dard-e-judai ko

yahi to ek dil-e-marhum ki baqi nishani hai

ye sach hai ya ghalat hum ne suna hai marne walon se

tere KHanjar mein qatil chashma-e-haiwan ka pani hai

batae jate hain ausaf wo apni adaon ke

ye shan-e-dil-raubai hai ye tarz-e-jaan-satani hai

yahan kya jaaniye kis tarah dekha hai tasawwur mein

wahan ab tak wahi parde ke andar lan-tarani hai

karen tasKHir aao mil ke hum tum donon aalam ko

idhar jadu-nigahi hai udhar jadu-bayani hai

'jalil' ek sher bhi KHali na paya dard o hasrat se

ghazal-KHwani nahin ye dar-haqiqat nauha-KHwani hai