qafas mein hun gar achchha bhi na jaanen mere shewan ko

qafas meñ huuñ gar achchhā bhī na jāneñ mere shevan ko

mirā honā burā kyā hai navā-sanjān-e-gulshan ko

nahīñ gar hamdamī āsāñ na ho ye rashk kyā kam hai

na dī hotī ḳhudāyā ārzū-e-dost dushman ko

na niklā aañkh se terī ik aañsū us jarāhat par

kiyā siine meñ jis ne ḳhūñ-chakāñ mizhgān-e-sozan ko

ḳhudā sharmā.e hāthoñ ko ki rakhte haiñ kashākash meñ

kabhī mere garebāñ ko kabhī jānāñ ke dāman ko

abhī ham qatl-gah kā dekhnā āsāñ samajhte haiñ

nahīñ dekhā shanāvar jū-e-ḳhūñ meñ tere tausan ko

huā charchā jo mere paañv kī zanjīr banñe kā

kiyā betāb kaañ meñ jumbish-e-jauhar ne aahan ko

ḳhushī kyā khet par mere agar sau baar abr aave

samajhtā huuñ ki DhūñDe hai abhī se barq ḳhirman ko

vafā-dārī ba-shart-e-ustuvārī asl īmāñ hai

mare but-ḳhāne meñ to ka.abe meñ gaaḌo barahman ko

shahādat thī mirī qismat meñ jo dī thī ye ḳhū mujh ko

jahāñ talvār ko dekhā jhukā detā thā gardan ko

na luTtā din ko to kab raat ko yuuñ be-ḳhabar sotā

rahā khaTkā na chorī kā duā detā huuñ rahzan ko

suḳhan kyā kah nahīñ sakte ki juuyā huuñ javāhir ke

jigar kyā ham nahīñ rakhte ki khodeñ jā ke ma.adan ko

mire shāh-e-sulaimāñ-jāh se nisbat nahīñ 'ġhālib'

farīdūn o jam o ke ḳhusrav o dārāb o bahman ko

qafas mein hun gar achchha bhi na jaanen mere shewan ko

mera hona bura kya hai nawa-sanjaan-e-gulshan ko

nahin gar hamdami aasan na ho ye rashk kya kam hai

na di hoti KHudaya aarzu-e-dost dushman ko

na nikla aankh se teri ek aansu us jarahat par

kiya sine mein jis ne KHun-chakan mizhgan-e-sozan ko

KHuda sharmae hathon ko ki rakhte hain kashakash mein

kabhi mere gareban ko kabhi jaanan ke daman ko

abhi hum qatl-gah ka dekhna aasan samajhte hain

nahin dekha shanawar ju-e-KHun mein tere tausan ko

hua charcha jo mere panw ki zanjir banne ka

kiya betab kan mein jumbish-e-jauhar ne aahan ko

KHushi kya khet par mere agar sau bar abr aawe

samajhta hun ki DhunDe hai abhi se barq KHirman ko

wafa-dari ba-shart-e-ustuwari asl iman hai

mare but-KHane mein to kabe mein gaDo barahman ko

shahadat thi meri qismat mein jo di thi ye KHu mujh ko

jahan talwar ko dekha jhuka deta tha gardan ko

na luTta din ko to kab raat ko yun be-KHabar sota

raha khaTka na chori ka dua deta hun rahzan ko

suKHan kya kah nahin sakte ki juya hun jawahir ke

jigar kya hum nahin rakhte ki khoden ja ke madan ko

mere shah-e-sulaiman-jah se nisbat nahin 'ghaalib'

faridun o jam o ke KHusraw o darab o bahman ko