qafas mein rah ke gul-o-nastaran ki baat karo

qafas meñ rah ke gul-o-nastaran kī baat karo

chaman se duur ho lekin chaman kī baat karo

abhī to jazb-e-mohabbat kī āzmā.ish hai

faroġh-e-ishq kī dār-o-rasan kī baat karo

jale shabāb ke tūfāñ meñ sham-e-taqvā kyā

bahār-e-nau kī sharāb-e-kuhan kī baat karo

ḳhilāf-e-maslak-e-ulfat hai shikva-e-sāqī

na tishnā-kāmī-e-kām-o-dahan kī baat karo

yahāñ fasāna-e-dair-o-haram se kyā hāsil

yahāñ to sāqī-e-īmāñ-shikan kī baat karo

ajab nahīñ ki qafas se rah-e-chaman nikle

asiir rah ke bahār-e-chaman kī baat karo

sukūt-o-gosha-nashīnī se 'qādrī' hāsil

suḳhan-varoñ meñ kamāl-e-suḳhan kī baat karo

qafas mein rah ke gul-o-nastaran ki baat karo

chaman se dur ho lekin chaman ki baat karo

abhi to jazb-e-mohabbat ki aazmaish hai

farogh-e-ishq ki dar-o-rasan ki baat karo

jale shabab ke tufan mein sham-e-taqwa kya

bahaar-e-nau ki sharab-e-kuhan ki baat karo

KHilaf-e-maslak-e-ulfat hai shikwa-e-saqi

na tishna-kaami-e-kaam-o-dahan ki baat karo

yahan fasana-e-dair-o-haram se kya hasil

yahan to saqi-e-iman-shikan ki baat karo

ajab nahin ki qafas se rah-e-chaman nikle

asir rah ke bahaar-e-chaman ki baat karo

sukut-o-gosha-nashini se 'qadri' hasil

suKHan-waron mein kamal-e-suKHan ki baat karo