qafas tak bhi pahunch hai ya faqat ek aashiyan tak hai

qafas tak bhī pahuñch hai yā faqat ik āshiyāñ tak hai

rasā.ī dekhnī hai barq-e-sozāñ kī kahāñ tak hai

mujhe lazzat-kash-e-bedād pā kar haath kyoñ rokā

zarā to āzmāte hausla dil kā kahāñ tak hai

yaqīñ apnī vafā par hai taġhāful kā nahīñ shikva

tirī begāngī ham jānte haiñ imtihāñ tak hai

nasheman phūñk kar zālim havā detā hai dāman kī

ġhubār-e-ḳhātir-e-sayyād ḳhāk-e-āshiyāñ tak hai

zarā sā dil hai lekin jaan hai bazm-e-do-ālam kī

ye saarī garmī-e-hangāma qalb-e-nā-tavāñ tak hai

shikast-e-dil kā baa.is ārzū-e-dil ko Thahrāyā

gumān-e-nek tujh se bad-gumāñ dekhā kahāñ tak hai

yahī rūh-e-tamanna hai yahī hai jān-e-dil 'kaifī'

qafas meñ zindagī apnī ḳhayāl-e-āshiyāñ tak hai

qafas tak bhi pahunch hai ya faqat ek aashiyan tak hai

rasai dekhni hai barq-e-sozan ki kahan tak hai

mujhe lazzat-kash-e-bedad pa kar hath kyon roka

zara to aazmate hausla dil ka kahan tak hai

yaqin apni wafa par hai taghaful ka nahin shikwa

teri begangi hum jaante hain imtihan tak hai

nasheman phunk kar zalim hawa deta hai daman ki

ghubar-e-KHatir-e-sayyaad KHak-e-ashiyan tak hai

zara sa dil hai lekin jaan hai bazm-e-do-alam ki

ye sari garmi-e-hangama qalb-e-na-tawan tak hai

shikast-e-dil ka bais aarzu-e-dil ko Thahraya

guman-e-nek tujh se bad-guman dekha kahan tak hai

yahi ruh-e-tamanna hai yahi hai jaan-e-dil 'kaifi'

qafas mein zindagi apni KHayal-e-ashiyan tak hai