qahr hua ghazab hua shor hai lala-zar mein

qahr huā ġhazab huā shor hai lāla-zār meñ

aag lagī bahār meñ aag lagī bahār meñ

apnā ma.āl-e-zindagī phūloñ ko dekh kar samajh

aaj ḳhizāñ-nasīb haiñ kal jo khile bahār meñ

dāġh-e-jigar ke phuul meñ phuul sadā-bahār ke

rahtā hai rañg ek saañ in kā ḳhizāñ bahār meñ

is husn is shabāb par nāz-o-ġhurūr is qadar

aaj hai aur kal nahīñ aap haiñ kis shumār meñ

mere gunāh bhī bahut rahmat-e-kirdgār bhī

ye bhī nahīñ shumār meñ vo bhī nahīñ shumār meñ

kis kī ziyā tirī ziyā kis kī jhalak tirī jhalak

anjum-o-mehr-o-māh meñ barq meñ nūr-o-nār meñ

taḌpeñ na ham to kyā kareñ dekh kar us ko ik nigāh

hoñ bijliyāñ bharī huī jis chashm-e-sehr-kār meñ

yār-o-azīz-o-aqrabā kā ye sulūk ba.ad-e-marg

dosh-ba-dosh le chale chhoḌne mujh ko ġhaar meñ

ḳhāl-o-ruḳh-e-habīb kī jalvagarī ke sāmne

chāñd hai kis qatār meñ taare haiñ kis shumār meñ

din shahīd-e-nāz kā kis kis jagah hai jalva-rez

kuchh hai shafaq meñ aur kuchh shāmil hai lāla-zār meñ

apne gunāh pe sharmsār dekh ke mujh ko roz-e-hashr

rahmat-e-haq ne le liyā 'sābir' mujhe kanār meñ

qahr hua ghazab hua shor hai lala-zar mein

aag lagi bahaar mein aag lagi bahaar mein

apna maal-e-zindagi phulon ko dekh kar samajh

aaj KHizan-nasib hain kal jo khile bahaar mein

dagh-e-jigar ke phul mein phul sada-bahaar ke

rahta hai rang ek san in ka KHizan bahaar mein

is husn is shabab par naz-o-ghurur is qadar

aaj hai aur kal nahin aap hain kis shumar mein

mere gunah bhi bahut rahmat-e-kirdgar bhi

ye bhi nahin shumar mein wo bhi nahin shumar mein

kis ki ziya teri ziya kis ki jhalak teri jhalak

anjum-o-mehr-o-mah mein barq mein nur-o-nar mein

taDpen na hum to kya karen dekh kar us ko ek nigah

hon bijliyan bhari hui jis chashm-e-sehr-kar mein

yar-o-aziz-o-aqraba ka ye suluk baad-e-marg

dosh-ba-dosh le chale chhoDne mujh ko ghaar mein

KHal-o-ruKH-e-habib ki jalwagari ke samne

chand hai kis qatar mein tare hain kis shumar mein

din shahid-e-naz ka kis kis jagah hai jalwa-rez

kuchh hai shafaq mein aur kuchh shamil hai lala-zar mein

apne gunah pe sharmsar dekh ke mujh ko roz-e-hashr

rahmat-e-haq ne le liya 'sabir' mujhe kanar mein