qaid-e-tanhai se qaid-e-umr mein aa jaunga

qaid-e-tanhā.ī se qaid-e-umr meñ aa jā.ūñgā

farq itnā hai ki khānā apne ghar kā khā.ūñgā

saañs kī zanjīr ne jakḌe haiñ mere haath paañv

apnī marzī se koī maiñ kaam kyā kar pā.ūñgā

ye añdherī raat aur be-samt sahrā kā safar

dushmanoñ se bach gayā to ḳhud bhī Thokar khā.ūñgā

aañkh se dekhūñgā jab maiñ hilte hoñToñ kī sadā

maiñ bhī bahrā ho gayā huuñ zor se chillā.ūñgā

naar ab gulzār hone ke zamāne ḳhatm haiñ

bhiik māñgūñgā ḳhudā se giit sab ke gā.uñgā

zābta koī nahīñ hai bārishoñ par munhasir

khet ke bījoñ meñ 'mājid' phūl-phal le ā.ūñgā

qaid-e-tanhai se qaid-e-umr mein aa jaunga

farq itna hai ki khana apne ghar ka khaunga

sans ki zanjir ne jakDe hain mere hath panw

apni marzi se koi main kaam kya kar paunga

ye andheri raat aur be-samt sahra ka safar

dushmanon se bach gaya to KHud bhi Thokar khaunga

aankh se dekhunga jab main hilte honTon ki sada

main bhi bahra ho gaya hun zor se chillaunga

nar ab gulzar hone ke zamane KHatm hain

bhik mangunga KHuda se git sab ke gaunga

zabta koi nahin hai barishon par munhasir

khet ke bijon mein 'majid' phul-phal le aaunga