qaid-e-zindan mein KHayal-e-baal-o-par aaya to kya

qaid-e-zindāñ meñ ḳhayāl-e-bāl-o-par aayā to kyā

putliyoñ meñ goyā ‘aks-e-bām-o-dar aayā to kyā

soch kar us ko mirā dil aaj bhar aayā to kyā

vo jazīra hai jazīre meñ khañDar aayā to kyā

mujh ko to be-jism jazboñ kī qabā darkār thī

kīsa-e-fan meñ jo harf-e-be-hunar aayā to kyā

aa ke bhī jaatā vo mere saath kitne duur tak

us ko aanā thā na aayā aur agar aayā to kyā

haath kyā tere mirī dastār tak aa jā.eñge

maiñ muravvat meñ zarā nīche utar aayā to kyā

is galī meñ gard-bād uThte hī rahte haiñ miyāñ

aaj phir tum sā koī shorīda-sar aayā to kyā

chilchilātī dhuup hī mazdūr ke hisse meñ thī

chhoḌ kar apnā vatan doha qatar aayā to kyā

zindagī ke din kaTe sūraj se do do haath meñ

ai 'nazīr' ab shaam hai bādal nazar aayā to kyā

qaid-e-zindan mein KHayal-e-baal-o-par aaya to kya

putliyon mein goya ‘aks-e-baam-o-dar aaya to kya

soch kar us ko mera dil aaj bhar aaya to kya

wo jazira hai jazire mein khanDar aaya to kya

mujh ko to be-jism jazbon ki qaba darkar thi

kisa-e-fan mein jo harf-e-be-hunar aaya to kya

aa ke bhi jata wo mere sath kitne dur tak

us ko aana tha na aaya aur agar aaya to kya

hath kya tere meri dastar tak aa jaenge

main murawwat mein zara niche utar aaya to kya

is gali mein gard-baad uThte hi rahte hain miyan

aaj phir tum sa koi shorida-sar aaya to kya

chilchilati dhup hi mazdur ke hisse mein thi

chhoD kar apna watan doha qatar aaya to kya

zindagi ke din kaTe suraj se do do hath mein

ai 'nazir' ab sham hai baadal nazar aaya to kya