قید ہیں یوں گردش حالات میں

قید ہیں یوں گردش حالات میں

فرق ہی کوئی نہیں دن رات میں

اب تو ان آنکھوں میں آنسو بھی نہیں

قحط پانی کا ہوا برسات میں

مٹ گئیں پل بھر میں ساری تلخیاں

کتنی شیرینی ہے تیری بات میں

شہر کے ہنگامے جن کے دم سے تھے

ہو گئے محصور اپنی ذات میں

تم کو دعویٰ ہے کرامت کا بہت

کوئی سورج تو اچھالو رات میں

کس طرح ہو بندگی کا حق ادا

ذہن الجھا ہے منات و لات میں

ایک ہی رب کی عبادت ہے روا

بائبل قرآن میں تورات میں

وقت کے ظلمت کدے سے پوچھئے

کتنے سورج گم ہیں تیری ذات میں

ٹھوکریں ان کا مقدر ہیں ندیمؔ

غرق ہیں جو عیش کے لمحات میں