qaid hain yun gardish-e-haalat mein

qaid haiñ yuuñ gardish-e-hālāt meñ

farq hī koī nahīñ din raat meñ

ab to in āñkhoñ meñ aañsū bhī nahīñ

qaht paanī kā huā barsāt meñ

miT ga.iiñ pal-bhar meñ saarī talḳhiyāñ

kitnī shīrīnī hai terī baat meñ

shahr ke hangāme jin ke dam se the

ho ga.e mahsūr apnī zaat meñ

tum ko da.avā hai karāmat kā bahut

koī sūraj to uchhālo raat meñ

kis tarah ho bandagī kā haq adā

zehn uljhā hai manāt-o-lāt meñ

ek hī rab kī ibādat hai ravā

bible qur.ān meñ taurāt meñ

vaqt ke zulmat-kade se pūchhiye

kitne sūraj gum haiñ terī zaat meñ

Thokareñ un kā muqaddar haiñ 'nadīm'

ġharq haiñ jo aish ke lamhāt meñ

qaid hain yun gardish-e-haalat mein

farq hi koi nahin din raat mein

ab to in aankhon mein aansu bhi nahin

qaht pani ka hua barsat mein

miT gain pal-bhar mein sari talKHiyan

kitni shirini hai teri baat mein

shahr ke hangame jin ke dam se the

ho gae mahsur apni zat mein

tum ko dawa hai karamat ka bahut

koi suraj to uchhaalo raat mein

kis tarah ho bandagi ka haq ada

zehn uljha hai manat-o-lat mein

ek hi rab ki ibaadat hai rawa

bible quran mein tauraat mein

waqt ke zulmat-kade se puchhiye

kitne suraj gum hain teri zat mein

Thokaren un ka muqaddar hain 'nadim'

gharq hain jo aish ke lamhat mein