qaidi hun sar-e-zulf-e-girah-gir se pahle

qaidī huuñ sar-e-zulf-e-girah-gīr se pahle

pāband huuñ paidā.ish-e-zanjīr se pahle

sar-gashta huuñ daur-e-falak-e-pīr se pahle

gardish meñ huuñ maiñ gardish-e-taqdīr se pahle

kyā laatī hai terī nigah-e-qahr kā muzhda

dauḌe hue aatī hai ajal tiir se pahle

nāloñ se unheñ hotī hai nafrat evaz-e-lutf

taqdīr bigaḌ jaatī hai tadbīr se pahle

maarā hai mujhe ḳhanjar-e-abrū se kisī ne

nahlā.īyo āb-e-dam-e-shamshīr se pahle

ghar se tire dīvāne ne jab paañv nikālā

chhāloñ ne qadam le liye zanjīr se pahle

kis tarah kahūñ aap ke hoñToñ kī halāvat

lab band hue jaate haiñ taqrīr se pahle

pāband-e-ġham-e-zulf kā marnā na chhupegā

pahuñchegī ḳhabar nāla-e-zanjīr se pahle

kis hausle par tālib-e-dīdār hai aalam

āñkheñ to laḌā le koī tasvīr se pahle

be-tāb hue yaar kī chuTkī se nikal kar

tiir aap taḌapne lage naḳhchīr se pahle

paane kī nahīñ dil kā Thikānā ḳhalish-e-ġham

jab tak na patā pūchhe tire tiir se pahle

ghabrāne se kyā kaam 'munīr'-e-jigar-afkār

tū arz to kar hazrat-e-shabbīr se pahle

qaidi hun sar-e-zulf-e-girah-gir se pahle

paband hun paidaish-e-zanjir se pahle

sar-gashta hun daur-e-falak-e-pir se pahle

gardish mein hun main gardish-e-taqdir se pahle

kya lati hai teri nigah-e-qahr ka muzhda

dauDe hue aati hai ajal tir se pahle

nalon se unhen hoti hai nafrat ewaz-e-lutf

taqdir bigaD jati hai tadbir se pahle

mara hai mujhe KHanjar-e-abru se kisi ne

nahlaiyo aab-e-dam-e-shamshir se pahle

ghar se tere diwane ne jab panw nikala

chhaalon ne qadam le liye zanjir se pahle

kis tarah kahun aap ke honTon ki halawat

lab band hue jate hain taqrir se pahle

paband-e-gham-e-zulf ka marna na chhupega

pahunchegi KHabar nala-e-zanjir se pahle

kis hausle par talib-e-didar hai aalam

aankhen to laDa le koi taswir se pahle

be-tab hue yar ki chuTki se nikal kar

tir aap taDapne lage naKHchir se pahle

pane ki nahin dil ka Thikana KHalish-e-gham

jab tak na pata puchhe tere tir se pahle

ghabrane se kya kaam 'munir'-e-jigar-afkar

tu arz to kar hazrat-e-shabbir se pahle