qais ka ishq mere ishq ka meyar nahin

qais kā 'ishq mire 'ishq kā me'yār nahīñ

sirf lailā.ī thā vo maañ kā vafādār nahīñ

'ishq meñ vo hai mirā peshvā ai qais-mizāj

jis ke kirdār ke jaisā koī kirdār nahīñ

tere māñ-bāp kī 'izzat hai mujhe tujh se 'azīz

aisā hargiz na samajh tujh se mujhe pyaar nahīñ

terī āñkhoñ se chhalakte hue ashkoñ kī qasam

koī duniyā meñ tirā mujh sā talabgār nahīñ

ghar kī dīvāreñ gulāboñ se munaqqash kī haiñ

vo kiyā hai chaman ījād jahāñ ḳhaar nahīñ

abhī fe se bhī bahut duur ho fankārī ke

abhī dā'vā na karo tum abhī fankār nahīñ

fat.h se qabl tujhe hogī ka.ī baar shikast

itnī āsān to ai haar mirī haar nahīñ

sarqa-bāzī pe bhī milte haiñ unheñ surḳh gulāb

naam me'yār hai ab daad kā ash'ār nahīñ

us ne vo pyaar jo ḳhairāt meñ baḳhshā thā 'sa'ūd'

anginat baar jatāyā koī ik baar nahīñ

qais ka 'ishq mere 'ishq ka me'yar nahin

sirf lailai tha wo man ka wafadar nahin

'ishq mein wo hai mera peshwa ai qais-mizaj

jis ke kirdar ke jaisa koi kirdar nahin

tere man-bap ki 'izzat hai mujhe tujh se 'aziz

aisa hargiz na samajh tujh se mujhe pyar nahin

teri aankhon se chhalakte hue ashkon ki qasam

koi duniya mein tera mujh sa talabgar nahin

ghar ki diwaren gulabon se munaqqash ki hain

wo kiya hai chaman ijad jahan KHar nahin

abhi fe se bhi bahut dur ho fankari ke

abhi da'wa na karo tum abhi fankar nahin

fath se qabl tujhe hogi kai bar shikast

itni aasan to ai haar meri haar nahin

sarqa-bazi pe bhi milte hain unhen surKH gulab

nam me'yar hai ab dad ka ash'ar nahin

us ne wo pyar jo KHairaat mein baKHsha tha 'sa'ud'

anginat bar jataya koi ek bar nahin