qais ka tujh mein junun jazba-e-mansur nahin

qais kā tujh meñ junūñ jazba-e-mansūr nahīñ

varna manzil-gah-e-dildār to kuchh duur nahīñ

koh-o-vādī vahī bijlī vahī be-hoshī bhī

jalva lekin vo dil-afroz sar-e-tūr nahīñ

DhūñDne jā.ūñ kise jā.ūñ to maiñ jā.ūñ kahāñ

dil ke jo paas hai vo aañkh bhī kuchh duur nahīñ

pher meñ zāt-o-sifat ke na sarāsīma ho

nahīñ ma.alūm ki jauhar se araz duur nahīñ

nazar aatā nahīñ tujh ko to hai āñkhoñ kā qusūr

aks se shaḳhs haqīqat meñ zarā duur nahīñ

jalva-sāmāñ hai rah-e-ishq meñ zarra zarra

sāhab-e-zauq-e-nazar muntazir-e-tūr nahīñ

amr-e-haq harf-e-azal hai to ye fatve kaise

vo na.ī baat nahīñ maiñ koī mansūr nahīñ

jhuuT sach us ko hai yaksāñ vo hai apnī dhun kā

haq-shanāsī mire naqqād kā dastūr nahīñ

kibr hī se to azāzīl hai shaitān-e-rajīm

aadmī hai vahī insān jo maġhrūr nahīñ

kyā tamāshā hai liye jaate haiñ taqdīr kā naam

aur tadbīr se ik lahza bhī ma.azūr nahīñ

nahīñ taqdīr kī tahrīr se inkār magar

is meñ tadbīr muqaddar hai jo mazkūr nahīñ

aap taqdīr sudhar jā.egī tadbīr to kar

kaun kahtā hai ki insān ko maqdūr nahīñ

tū avāriz se avāriz kī hai tujh se parvāz

tū jo mutlaq nahīñ muḳhtār to majbūr nahīñ

zarre zarre ko hai ik farz vadī.at haq se

na samajh to koī qaisar nahīñ faġhfūr nahīñ

kār-gāh-e-amal is dahr ko vo samjhe haiñ

gul-o-bulbul ke karishmoñ se jo mātūr nahīñ

kal maiñ mil-jul ke rahe juz kā usī meñ hai vaqār

fard nāchīz hai gar shāmil-e-jamhūr nahīñ

kyuuñ khiche rahte haiñ ye shaiḳh-o-barahman bāham

dair ka.aba se jo haq par ho nazar duur nahīñ

adab-o-sher kā aalim hai vo vahdat-e-ā.īñ

ki jahāñ kāfir-o-dīñ-dār kā mazkūr nahīñ

had-e-juġhrāfiya se sher kī duniyā hai judā

duur kīlās se do gaz bhī yahāñ tuur nahīñ

kaif baaqī hai vo is meñ ki nahīñ jis ko ḳhumār

bāda-e-sher koī bāda-e-a.agūr nahīñ

sāqī-e-mast-nazar hai ye fusūñ yā e.ajāz

sab ko mad.hosh kiyā aap to maḳhmūr nahīñ

sāġhar ik aur bhī de pīr-e-muġhāñ 'kaifī' ko

nashsha-e-be-ḳhudī-e-ishq meñ vo chuur nahīñ

qais ka tujh mein junun jazba-e-mansur nahin

warna manzil-gah-e-dildar to kuchh dur nahin

koh-o-wadi wahi bijli wahi be-hoshi bhi

jalwa lekin wo dil-afroz sar-e-tur nahin

DhunDne jaun kise jaun to main jaun kahan

dil ke jo pas hai wo aankh bhi kuchh dur nahin

pher mein zat-o-sifat ke na sarasima ho

nahin malum ki jauhar se araz dur nahin

nazar aata nahin tujh ko to hai aankhon ka qusur

aks se shaKHs haqiqat mein zara dur nahin

jalwa-saman hai rah-e-ishq mein zarra zarra

sahab-e-zauq-e-nazar muntazir-e-tur nahin

amr-e-haq harf-e-azal hai to ye fatwe kaise

wo nai baat nahin main koi mansur nahin

jhuT sach us ko hai yaksan wo hai apni dhun ka

haq-shanasi mere naqqad ka dastur nahin

kibr hi se to azazil hai shaitan-e-rajim

aadmi hai wahi insan jo maghrur nahin

kya tamasha hai liye jate hain taqdir ka nam

aur tadbir se ek lahza bhi mazur nahin

nahin taqdir ki tahrir se inkar magar

is mein tadbir muqaddar hai jo mazkur nahin

aap taqdir sudhar jaegi tadbir to kar

kaun kahta hai ki insan ko maqdur nahin

tu awariz se awariz ki hai tujh se parwaz

tu jo mutlaq nahin muKHtar to majbur nahin

zarre zarre ko hai ek farz wadiat haq se

na samajh to koi qaisar nahin faghfur nahin

kar-gah-e-amal is dahr ko wo samjhe hain

gul-o-bulbul ke karishmon se jo matur nahin

kal main mil-jul ke rahe juz ka usi mein hai waqar

fard nachiz hai gar shamil-e-jamhur nahin

kyun khiche rahte hain ye shaiKH-o-barahman baham

dair kaba se jo haq par ho nazar dur nahin

adab-o-sher ka aalim hai wo wahdat-e-ain

ki jahan kafir-o-din-dar ka mazkur nahin

had-e-jughrafiya se sher ki duniya hai juda

dur kilas se do gaz bhi yahan tur nahin

kaif baqi hai wo is mein ki nahin jis ko KHumar

baada-e-sher koi baada-e-agur nahin

saqi-e-mast-nazar hai ye fusun ya eajaz

sab ko madhosh kiya aap to maKHmur nahin

saghar ek aur bhi de pir-e-mughan 'kaifi' ko

nashsha-e-be-KHudi-e-ishq mein wo chur nahin