qalam ho jae sar parwa na karna

qalam ho jaa.e sar parvā na karnā

amīr-e-shahr ko sajda na karnā

kiyā tark-e-ta.alluq tum ne behtar

magar us kā kahīñ charchā na karnā

mujhe turbat meñ az-had āfiyat hai

masīhā ab mujhe zinda na karnā

baḌhātā hai kasal dūrī-e-manzil

ḳhayāl-e-vus.at-e-sahrā na karnā

kaThin ho jā.egī manzil-shanāsī

kabhī masḳh un kā naqsh-e-pā na karnā

mohabbat meñ ye hai dastūr-e-duniyā

zarā sī baat ko ifshā na karnā

ye hai ab ik tarīqa guftugū kā

kisī ke sāmne lab vā na karnā

tumhāre muñh pe vo sach bol degā

muqābil apne ā.īna na karnā

munāsib hai ki 'ājiz' tauba kar lo

na taz.hīk-e-mai-o-mai-ḳhāna karnā

qalam ho jae sar parwa na karna

amir-e-shahr ko sajda na karna

kiya tark-e-talluq tum ne behtar

magar us ka kahin charcha na karna

mujhe turbat mein az-had aafiyat hai

masiha ab mujhe zinda na karna

baDhata hai kasal duri-e-manzil

KHayal-e-wusat-e-sahra na karna

kaThin ho jaegi manzil-shanasi

kabhi masKH un ka naqsh-e-pa na karna

mohabbat mein ye hai dastur-e-duniya

zara si baat ko ifsha na karna

ye hai ab ek tariqa guftugu ka

kisi ke samne lab wa na karna

tumhaare munh pe wo sach bol dega

muqabil apne aaina na karna

munasib hai ki 'ajiz' tauba kar lo

na tazhik-e-mai-o-mai-KHana karna